Crime News : माता आणि लेकीच्या पवित्र नात्याला काळिमा फासणारी एक अत्यंत सुन्न करणारी घटना नवी मुंबईतील कळंबोली भागात उघडकीस आली आहे. अवघ्या ६ वर्षांच्या चिमुरडीला नीट बोलता येत नाही आणि ती मराठीऐवजी हिंदीत बोलते, या कारणावरून एका उच्चशिक्षित आईने पोटच्या गोळ्याची गळा आवळून हत्या केली. याप्रकरणी कळंबोली पोलिसांनी ३० वर्षीय महिलेला अटक केली असून, या घटनेने संपूर्ण शहरात खळबळ उडाली आहे.
बोलण्यातील अडथळ्यामुळे आई होती नाराज
कळंबोली येथील सेक्टर १ मधील गुरूसंकल्प सोसायटीत हे कुटुंब वास्तव्यास आहे. पती आयटी अभियंता असून पत्नी बीएस्सी शिक्षित आहे. २०१७ मध्ये विवाह झालेल्या या दांपत्याला २०१९ मध्ये मुलगी झाली. मात्र, ही मुलगी ६ वर्षांची होऊनही तिला बोलण्यात अडचण येत होती. ती स्पष्टपणे मराठी बोलू शकत नव्हती, यावरून तिची आई सतत चिंतेत आणि रागात असायची. “मुलगी व्यवस्थित बोलत नाही, ती नको,” अशी तक्रार ती पतीकडे वारंवार करायची. पतीने अनेकदा तिला समजावण्याचा प्रयत्न केला, मात्र आईच्या मनातील राग कमी झाला नाही.
हृदयविकाराचा बनाव अन् पोलिसांचा संशय
२३ डिसेंबर रोजी या क्रूर कटाची अंमलबजावणी करण्यात आली. त्या दिवशी मुलीची आजी तिला भेटण्यासाठी काही भेटवस्तू घेऊन आली होती, पण तिला आपल्या नातीला भेटता आले नाही. रात्री पती घरी परतल्यावर मुलगी झोपेतून उठत नसल्याचे नाटक आईने केले. तातडीने तिला रुग्णालयात नेण्यात आले, तिथे तिचा मृत्यू हृदयविकाराच्या झटक्याने झाल्याचा बनाव आईने रचला. मात्र, कळंबोली पोलीस ठाण्याचे वरिष्ठ पोलीस निरीक्षक राजेंद्र कोते यांना या घटनेत संशय आला आणि त्यांनी मृतदेहाचे शवविच्छेदन करण्याचा निर्णय घेतला.
सहा तासांच्या चौकशीत सत्य आले बाहेर
शवविच्छेदन अहवालात मुलीचा मृत्यू गुदमरून झाल्याचे स्पष्ट झाले. पोलिसांनी जेव्हा आई-वडिलांची कसून चौकशी केली, तेव्हा सुमारे सहा तासांच्या उलटतपासणीनंतर आईने आपला गुन्हा कबूल केला. मुलीला संपवल्यानंतर तिने स्वतःचे कृत्य लपवण्यासाठी खोटा बनाव रचला होता. दरम्यान, संबंधित महिलेवर मनोविकार तज्ज्ञांचे उपचार सुरू असल्याची माहितीही तपासात समोर आली आहे. पोलिसांनी महिलेला अटक केली असून या प्रकरणाचा पुढील तपास सुरू आहे.
