चाकण (पुणे) – घरगुती सिलेंडरमधून गॅस चोरी करणाऱ्या तिघांना चाकण पोलिसांनी तुकाईनगर काळूस परिसरातून शनिवारी (ता.२१) मध्यरात्री अटक केली आहे.
तुकाराम लक्ष्मण आढाव (वय-४० , रा. भोसे, ता. खेड), मंथन सुभाष शिंदे (वय २४, रा. रासे, ता. खेड), जयसिंग परशुराम गादेकर (वय ४९, रा. भोसे, ता. खेड) अशी अटक करण्यात आलेल्या आरोपींची नावे आहेत. याप्रकरणी पोलीस शिपाई प्रेमकुमार पावडे यांनी चाकण पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, वरील तीनही आरोपी एका गॅस सिलेंडर मधून दुसऱ्या गॅस सिलेंडर मध्ये धोकादायकपणे गॅसची चोरी करून विकत आहेत. अशी माहिती चाकण पोलिसांना एका खबऱ्यामार्फत मिळाली होती. मिळालेल्या माहितीच्या अनुषंगाने पोलिसांनी सापळा रचून वरील तिन्ही आरोपींना तुकाईनगर काळूस परिसरातून अटक केली आहे. पुढील तपास चाकण पोलीस करीत आहेत.
