आदित्य बोराटे –
पुणे : महाराष्ट्र राज्याचे कृषिमंत्री दत्तात्रय भरणे यांच्या सभेचा व्हिडिओ फेसबुकवर पाहताना अश्लील भाषेत धमकी व शिवीगाळ केल्याची तक्रार इंदापूर पोलिस ठाण्यात दाखल झाली आहे. याप्रकरणी राहुल खुरंगे (रा. लाखेवाडी, ता. इंदापूर) याच्याविरुद्ध गुन्हा दाखल करण्यात आला आहे.
याबाबत वरकुटे बुद्रुक येथील संदेश प्रतापराव देवकर (वय ५०, व्यवसाय शेती) यांनी इंदापूर पोलिस ठाण्यात फिर्याद दिली. पोलिसांनी भारतीय न्याय संहिता २०२३ मधील कलम २९६, ३५२ व ३५१(२) अन्वये गुन्हा दाखल केला आहे.
फिर्यादीनुसार, २९ जुलै रोजी सकाळी आठ वाजल्यापासून वरकुटे बुद्रुक येथील राहत्या घरी असताना देवकर हे फेसबुकवर दत्तात्रय भरणे यांच्या सभेचा व्हिडिओ पाहत होते. त्यावेळी सार्वजनिक कमेंट्स विभागात राहुल खुरंगे याने अश्लील भाषेत धमकी व शिवीगाळ केल्याचे दिसून आले. याबाबत पक्षातील इतर पदाधिकाऱ्यांशी चर्चा केल्यानंतर १५ ऑगस्ट रोजी पोलिस ठाण्यात तक्रार दाखल करण्यात आली.
या गुन्ह्याचा तपास पोलिस हवालदार फाळके करीत आहेत. गुन्हा दाखल करण्याची कार्यवाही पोलिस हवालदार काळे यांनी केली आहे .
