पुणे : पती – पत्नी वेगळे असल्याच्या कौटुंबिक कारणावरून सासु – सासर्यांनी जावयाच्या अंगावर पेट्रोल टाकून त्याला पेटवल्याचा धक्कादायक प्रकार खराडी येथील रिलायन्स मॉलजवळ घडला आहे. शुक्रवारी (ता. ३०) सायंकाळी पाच वाजण्याच्या सुमारास ही घटना घडली असून या घटनेत जावई गंभीररित्या भाजला गेला.
याप्रकरणी लखन बाजीराव काळे (वय ३२, रा. शिरुर) यांनी चंदननगर पोलीस ठाण्यात फिर्याद दिली आहे. त्यानुसार चंदननगर पोलिसांनी सासरे रणजीत ऊर्फ गेंड्या याजिंदर भोसले, सासु बासुंदी रणजीत ऊर्फ गेंड्या भोसले, साडु अलताफ विजय काळे, पत्नी पेडम लखन काळे, मेहुणा कावकर रणजीत ऊर्फ गेंड्या भोसले (सर्व रा. झेन्सार कंपनीसमोर, खराडी) यांच्यावर खूनाचा प्रयत्न केल्याचा गुन्हा दाखल केला आहे.
पोलिसांनी दिलेल्या माहितीनुसार, लखन काळे व त्याची पत्नी पेडम यांच्यात कौटुंबिक वाद आहेत. त्यामुळे त्याची पत्नी, मुलगा व मुलगी हे फिर्यादी सोबत रहात नाही. त्यावरुन त्यांच्यात वाद सुरु होता. शुक्रवारी सायंकाळी लखन हे झाडाखाली बसले असताना त्याचे सासु सासरे व काही नातेवाईक सदर ठिकाणी आले.
दरम्यान, पत्नीला नांदवित नसल्याच्या कारणावरुन त्यांनी लखन यांना मारहाण करण्यास सुरुवात केली. व सासु सासरे यांनी प्लॅस्टिकच्या बाटलीमधील पेट्रोल लखन यांच्या अंगावर टाकून दिले व सासुने काडी पेटवून त्यांच्या अंगावर टाकली. यामध्ये लखन यांचे पोट, पाठ, गळा, छाती व दोन्ही हात भाजले असून त्यांच्यावर उपचार करण्यात येत आहे.
पोलीस निरीक्षक जानकर अधिक तपास करीत आहेत.
