उत्तराखंड : केदारनाथमध्ये हेलिकॉप्टर कोसळून सहा जणांचा मृत्यू झाल्याची धक्कादायक घटना उत्तराखंडमधील फाटा भागात घडली आहे. अशी माहिती मुख्यमंत्र्यांचे विशेष प्रधान सचिव अभिनव कुमार यांनी दिली.
मिळालेल्या माहितीनुसार, हेलिकॉप्टरने केदारनाथ बेस कॅम्प येथून नारायण कोटी-गुप्तकाशीसाठी उड्डाण केले होते. हेलिकॉप्टर केदारनाथपासून तीन किलोमीटर अंतरावर गेले असताना हा अपघात झाला. अपघातग्रस्त हेलिकॉप्टर आर्यन या कंपनीचे असल्याची माहिती मिळत आहे. या घटनेची माहिती मिळताच तातडीने घटनास्थळी बचावकार्य पथक पाठवले आहे.
दरम्यान, केदारनाथमध्ये सध्या धुक्याची दाट चादर आहे. त्यामुळे या भागातील दृष्यता कमी झाली आहे. याचाच फटका हवाई वाहतुकीला बसत आहे.
