पुणे : आंतरराष्ट्रीय विमानतळावर शुक्रवारी सकाळी मोठी खळबळ उडाली. गुवाहाटीकडे रवाना होणाऱ्या विमानाच्या प्रसाधनगृहात “बॉम्ब” असा मजकूर लिहिलेली संशयास्पद चिठ्ठी आढळल्याने सुरक्षा यंत्रणा तात्काळ सतर्क झाली. विमानाची सखोल तपासणी करण्यात आली असून कोणतीही बॉम्बसदृश वस्तू आढळली नाही. Pune Airport
या प्रकरणी विमानतळ प्रशासनाचे अधिकारी विशालकुमार श्रीवास्तव यांनी विमानतळ पोलीस ठाण्यात फिर्याद दिली असून अज्ञात व्यक्तीविरुद्ध गुन्हा दाखल करण्यात आला आहे. चिठ्ठी सापडल्यानंतर विमानातील प्रवाशांच्या सुरक्षिततेच्या दृष्टीने संपूर्ण विमानाची तपासणी करण्यात आली. या घटनेमुळे गुवाहाटीला जाणाऱ्या विमानाच्या उड्डाणाला काही काळ विलंब झाला. Pune Airport
वरिष्ठ पोलीस निरीक्षक गोविंद जाधव यांनी घटनास्थळी भेट देत परिस्थितीचा आढावा घेतला. पोलीस उपनिरीक्षक गुंड या प्रकरणाचा तपास करत आहेत. यापूर्वीही पुणे विमानतळाला ई-मेल आणि दूरध्वनीद्वारे बॉम्बच्या खोट्या धमक्या मिळाल्या होत्या. अशा प्रकारच्या खोडसाळ कृत्यांमुळे सुरक्षा यंत्रणांवर अतिरिक्त ताण येत असल्याचे प्रशासनाने नमूद केले आहे. Pune Airport
