पुणे : कात्रज-देहूरोड महामार्गावरील भूमकर पुलाकडे जाणाऱ्या सर्व्हिस रोडवर भरधाव डंपरने धडक दिल्याने दुचाकीस्वाराचा जागीच मृत्यू झाल्याची घटना उघडकीस आली आहे. हा अपघात बुधवारी (ता.१८) दुपारी १ वाजता भूमकर पुलाजवळ घडला आहे.
निखिल गोविंदराव राठोड (वय २९, रा. ज्ञानेश्वर पार्क, नऱ्हे, मूळ महागाव, यवतमाळ) असे मृत्यू झालेल्या तरुणाचे नाव आहे. याप्रकरणी सिंहगड रोड पोलिसांनी डंपरचालकाच्या विरोधात गुन्हा दाखल केला आहे. पोलिस शिपाई इरफान तडवी यांनी फिर्याद दिली आहे.
मिळालेल्या माहितीनुसार, निखिल राठोड हा मोटारसायकलवरून सर्व्हिस रोडने भूमकर पुलाकडून महामार्गाकडे जात होता. यावेळी भरधाव आलेल्या डंपरने त्यांच्या मोटारसायकलला धडक दिली. निखिल हा डंपरखाली सापडल्याने त्याचा जागीच मृत्यू झाला. अपघातानंतर डंपरचालक गाडी तेथेच सोडून पळून गेला.
दरम्यान, अपघाताची माहिती मिळताच च सिंहगड रोड पोलिस घटनास्थळी दाखल झाले. त्यांनी वाहने बाजूला घेऊन वाहतूक सुरळीत केली. डंपरचालकाचा शोध सिंहगड रोड पोलिस घेत आहेत.
