पुणे : पुण्यातील विवाहीत तरुणी वैष्णवी हगवणे हिच्या बाळाबाबत मोठी बातमी समोर आली आहे. तिच्या मृत्यूनंतर बाळाचं संगोपन कोण करणार? तिच्या बाळाचा ताबा कोणाकडे असणार असा प्रश्न निर्माण झाला होता? मुलगा जनक हगवणे याचा सांभाळ करण्यासाठी बाल कल्याण समितीने त्याची आजी व वैष्णवी हगवणे यांच्या आई स्वाती कस्पटे यांना योग्य व्यक्ती म्हणून नियुक्त केलं असल्याची माहिती समोर आली आहे.याबाबत मंत्री आदिती तटकरे यांनी ट्विट करत माहिती दिली आहे.
पुण्यातील स्व. वैष्णवी हगवणे यांच्या मृत्यूपश्चात त्यांचा 9 महिन्यांचा मुलगा जनक हगवणे याचा सांभाळ करण्यासाठी बाल कल्याण समितीने त्याच्या आजी व स्व. वैष्णवी हगवणे यांच्या आई श्रीमती स्वाती कस्पटे यांना योग्य व्यक्ती म्हणून नियुक्त केले आहे. याबाबत जिल्हा बाल संरक्षण अधिकाऱ्यांनी सादर केलेल्या सामाजिक तपासणी अहवालानुसार श्रीमती स्वाती कस्पटे याच योग्य व्यक्ती असून त्यांचे सामाजिक, भावनिक व कौटुंबिक वातावरण बालकाच्या हितासाठी अनुकूल आहे.यापुढे स्व. वैष्णवी हगवणे यांचा मुलगा कु. जनक हगवणे यांचा कायदेशीर ताबा श्रीमती स्वाती कस्पटे यांच्याकडे असेल. बालकाच्या शिक्षणाची, आरोग्याची व सर्वांगीण विकासाची संपूर्ण जबाबदारी श्रीमती स्वाती कस्पटे यांची असेल.’ असं ट्विट आदिती तटकरे यांनी केलं आहे.
वैष्णवी आत्महत्या प्रकरणात पोलिसांनी तिचा पती, दीर, सासू, ससार आणि नणंद यांना अटक केली आहे. त्यापैकी वैष्णवीचा पती शशांक हगवणे, सासू लता हगवणे आणि नणंद करिष्मा हगवणे हे सध्या न्यायालयीन कोठडीत आहेत, तर वैष्णवीचा दीर सुशील हगवणे आणि सासरा राजेंद्र हगवणे हे पोलीस कोठडीत आहेत.
