हडपसर, ता.०५ : बलात्काराच्या गुन्हयात अटक करण्यात आलेल्या आरोपीने पोलिसांना धक्का देवून पळून गेल्याची धक्कादायक घटना घडली आहे. हि खळबळजनक घटना हडपसर पोलिस ठाण्याच्या अंकित असलेल्या मगरपट्टा पोलिस चौकीत सोमवारी सायंकाळी साडेसात वाजण्याच्या सुमारास घडली आहे.
प्रीतम चंदूलाल ओसवाल (वय ३२, रा. उरुळी देवाची, सासवड रस्ता) असे पसार झालेल्याचे नाव आहे. याप्रकरणी ओसवाल याच्याविरुद्ध हडपसर पोलीस ठाण्यात गुन्हा दाखल करण्यात आला.
पोलिसांनी दिलेल्या माहितीनुसार, ओसवाल आणि एका महिलेची समाजमाध्यमातून ओळख झाली होती. ओसवालने महिलेला न्यायालयीन प्रकरणात मदत करण्याचे आमिष दाखवून तिच्याशी जवळीक निर्माण केली. त्यानंतर त्याने तिच्यावर बलात्कार केला. ओसवालने समाजमाध्यमात छायाचित्रे प्रसारित करण्याची धमकी महिलेला दिली होती. याप्रकरणी महिलेने फिर्याद दिल्यानंतर ओसवालला पोलिसांनी अटक केली होती.
हडपसर पोलिस ठाण्यात दाखल असलेल्या बलात्कार आणि विनयभंगाच्या गुन्हयात पोलिसांनी प्रितम ओसवाल याला ३१ ऑगस्ट २०२३ रोजी अटक केली होती. तो सध्या पोलिसांच्या कस्टडीत होता. सोमवारी रात्री हडपसर भागातील मगरपट्टा चौकीत पोलीस कर्मचाऱ्यांना धक्का देऊन तो पसार झाला.
