पुणे : शिक्षक दिन म्हणून देशभरात ५ सप्टेंबर हा दिवस मोठ्या उत्साहात साजरा केला जातो. या दिवशीच शिक्षकांच्या वेतनासंदर्भात एक धक्कादायक बातमी समोर आली आहे. पुणे विभागातील संस्थांचालकांच्या चुकांमुळे पुणे, सोलापूर, अहमदनगर या तीन जिल्ह्यांतील शिक्षकांचा पगार रखडणार आहे. शालार्थ आयडीच्या प्रस्तावांमध्ये अनेक त्रुटी असल्याचा फटका या शिक्षकांना बसणार आहे. शालार्थ आयडी निघाल्याशिवाय शिक्षकांचे पगार होत नाहीत. यामुळे या शिक्षकांना विनावेतन काम करावे लागणार आहे.
याबाबत मिळालेल्या माहितीनुसार, पुणे विभागातील कनिष्ठ महाविद्यालयातील शिक्षकांचे शालार्थ आयडी तयार करण्यासाठी एक शिबीर घेण्यात आले होते. या शिबिरात १६७ शिक्षकांचे प्रस्ताव आले. त्यापैकी १६१ शिक्षक आणि कर्मचाऱ्यांच्या प्रस्तावांमध्ये अनेक त्रुटी असल्याने, हे प्रस्ताव फेटाळण्यात आले. पुणे विभागीय शिक्षण उपसंचालक कार्यालयाअंतर्गत असणारी ही प्रकरणे आहेत.
राज्यात २०१२ नंतर शिक्षक भरतीला बंदी होती. त्या काळात भरती झाली आहे. कर्मचाऱ्यांची भरती करताना संस्थांचालकांनी रितसर परवानगी घेतली नाही. काही शिक्षकांचे आणि कर्मचाऱ्यांचे प्रस्ताव अर्धवटच सादर केले गेले. यामुळे हे प्रस्ताव फेटाळण्यात आले. पुणे येथील अप्पर जिल्हाधिकारी मंजुषा मिसकर यांची पुणे बोर्डात प्रतिनियुक्तीवर नियुक्ती केली होती. त्यावेळी त्यांनी सर्व कागदपत्रांची तपासणी केल्यानंतर १६१ प्रस्ताव फेटाळले. याचा फटका शिक्षकांच्या वेतनाला बसणार आहे.
शालार्थ आयडी क्रमांक म्हणजे शिक्षक आणि कर्मचाऱ्यांच्या नियुक्तीला मान्यता आहे, असे मानले जाते. हा क्रमांक मिळाल्यानंतरच वेतन सुरू होते. मुख्याध्यापक किंवा प्राचार्य यासंदर्भातील प्रस्ताव माध्यमिक शिक्षणाधिकारींकडे पाठवतात. प्रस्ताव पुढे माध्यमिक शिक्षणाधिकाऱ्यांकडे जातो. त्यांच्याकडून शिक्षण उपसंचालकांकडे प्रस्ताव पाठवला जातो. त्यानंतर शिक्षण उपसंचालक आणि शेवटी शिक्षण संचालकांकडून मान्यता दिली जाते. परंतु त्रुटी असल्यास हे प्रस्ताव फेटाळण्यात येतात. पुणे विभागास राज्यातील इतर विभागांमध्ये अशी प्रकरणे घडली आहेत. यामुळे त्या शिक्षकांसमोर वेतनचा प्रश्न निर्माण झाला आहे.
