खेड : लग्नाचे आमिष दाखवून नागरिकांना फसविणाऱ्या टोळीचा पर्दापाश करण्यास पारगाव कारखाना पोलिसांना यश आले आहे. पोलिसांनी फिल्मी स्टाईलने पाठलाग करून ४ जणांना अटक केली आहे. तर सहा जणांच्या विरोधात गुन्हा दाखल करण्यात आला आहे.
शितल रमेश खुडे उर्फ यास्मीन अन्वर बेग (वय-२७, रा. डी बंगला चौक, शिवाजीनगर), पुणे लता अविनाश कोटलवार ( वय-५१) मनोज अविनाश कोटलवार (वय-२४ सध्या रा इंदीरानगर, आळंदी ता. खेड, मुळ रा. नांदेड) व गणपत हांबु वाळुंज अशी अटक करण्यात आलेल्या आरोपींची नावे आहेत.
तर वसंत किसन थोरात (रा मंचर ता आंबेगाव), वैशाली मोरे रा पुणे (पूर्ण नाव पत्ता माहित नाही) यांच्या विरुध्द गुन्हा दाखल केला आहे. याप्रकरणी गणेश खंडू बांगर ( रा. भराडी ता. आंबेगाव) यांनी पारगाव कारखाना पोलिस ठाण्यात तक्रार दिली आहे.
पोलिसांनी दिलेल्या माहितीनुसार, भराडी (ता. आंबेगाव) येथील गणेश बांगर यांच्या वडिलांनी वसंत किसन थोरात (रा. मंचर ) यांना गणेशसाठी मुलगी पाहण्यासाठी सांगितले होते.
त्यानंतर वसंत थोरात हे एक पुरूष व तीन महिलासह भराडी येथे २२ डिसेंबरला आले होते. व गणेश बांगर यांच्या घरात मुलगा मुलगी पाहण्याचा कार्यक्रम झाल्यानंतर लग्न जमवण्याची बैठक झाली. त्यावेळी मुलगी शीतल ही अनाथ असून तिचा सांभाळ आम्ही केला आहे. आणि लग्न जमविण्यासाठी मुलीकडील लोकांना दीड लाख रुपये द्यावे लागतील असे मध्यस्थांनी सांगितले होते.
दरम्यान, सध्या लग्नासाठी मुली मिळत नसल्याने बांगर कुटुंबानेही १ लाख ३० हजार रुपये देण्याचे कबूल केले व मुलाचे वडील यांनी नातेवाईकडून एक लाख रुपये उसने घेऊन व स्वत:कडील ३० हजार रुपये असे एकूण १ लाख ३० हजार रुपये मध्यस्थाला दिले.
त्याच दिवशी सायंकाळी मुलगा गणेश व मुलगी शीतल यांचे घरातच हार घालून घरगुती लग्न लावले. व दुसऱ्या दिवशी मंचर येथील एका मंगल कार्यालयात नोंदणी पद्धतीने विवाह करून वकिलांकडे नोटरीही करण्यात आली.
त्यानंतर नववधू शीतल हिच्याकडे मोबाईल नसल्यामुळे मुलगा गणेश याच्या मोबाईल वरून ती तिची मावशी बरोबर बोलत होती. शीतल हिचे वागणे संशास्पद वाटल्याने मुलगा गणेश याने मोबाईल मध्ये रेकार्डिंग सुरु केले.
मुलगी शीतल ही नातेवाईकांबरोबर बोलत असताना लग्नाची पूजा झाल्यानंतर दागिने घेऊन गुजरातला पळून जाण्याचा कट रचत असल्याचे मोबाईलमध्ये रेकार्डिंगवरून समजले. त्यानंतर गणेश बांगर यांनी पारगाव पोलीस ठाण्यात फसवणूक झाल्याची तक्रार दाखल केली.
नववधू शीतल ही शुक्रवारी (ता.३० डिसेंबर) मंचर येथील संभाजी चौक येथे नातेवाईकांना भेटायला गेली असता, पारगाव कारखाना पोलिसांनी सापळा रचून आरोपींना अटक केली आहे.
ही कामगिरी पारगाव कारखाना पोलीस ठाण्याचे सहाय्यक पोलीस निरीक्षक लहुजी थाटे, पोलीस उपनिरीक्षक भाऊसाहेब लोकरे, पोलीस हवालदार देवानंद किर्वे, अविनाश कालेकर, चंद्रकांत गव्हाणे, श्यामल तळेकर आणि निशा गुळवे यांच्या पथकाने केली आहे.
