Baramati News बारामती, ता.५ : बफेसबुक मार्केटप्लेसवरील ‘बाजारभावापेक्षा स्वस्त गहू’ या आमिषाला बळी पडलेल्या व्यापाऱ्याला निर्जन ठिकाणी नेऊन पिस्तूलाचा धाक दाखवत बेदम मारहाण करून रोख रक्कम व दागिने लुटणाऱ्या टोळीला बारामती तालुका पोलिसांनी अवघ्या काही तासांत जेरबंद करत कौतुकास्पद कामगिरी बजावली आहे. वेगवान सायबर तपास, सीसीटीव्ही विश्लेषण आणि पाच स्वतंत्र पोलिस पथकांच्या समन्वयामुळे ही कारवाई शक्य झाली. Baramati News
या प्रकरणात रवी संजय माने (वंजारवाडी), श्रीकांत अर्जुन घुले (ढेकळवाडी), अभिषेक भाऊसो ठोंबरे (ढेकळवाडी) आणि अतुल मोहन भोलणकर (वंजारवाडी) या चौघांना अटक करण्यात आली आहे. तासगाव (जि. सांगली) येथील सूरज सरजेराव गावडे (वय २७) हे गव्हाच्या पिठाच्या व्यवसायात असून, फेसबुकवरील जाहिरात पाहून त्यांनी संपर्क साधला होता.
आरोपींनी बनावट फेसबुक अकाउंटवरून गावडे यांच्याशी संपर्क साधत त्यांना बारामती येथे येण्यास सांगितले. ४ मे रोजी गावडे हे टेम्पोसह रोख रक्कम घेऊन आले. फोनवरून सूचनांचा खेळ करत त्यांना पेन्सिल चौक, कल्याणी कॉर्नर येथे फिरवण्यात आले. तेथे एका स्कूटीस्वाराने “शेठने पाठवले आहे” असे सांगत त्यांना गहू दाखवण्याच्या बहाण्याने सोबत नेले. स्कूटीला नंबर प्लेट नव्हती आणि चालकाने चेहरा मास्कने झाकला होता. Baramati News
यानंतर गावडे व त्यांच्या चालकाला पेंजिओ कंपनीमागील पुलाच्या कामाजवळील निर्जन जागी नेण्यात आले, जिथे आधीच इतर आरोपी कारमध्ये थांबलेले होते. तेथे पोहोचताच आरोपींनी पिस्तूल काढून दोघांच्या कपाळावर रोखले आणि शिवीगाळ करत बेदम मारहाण सुरू केली.
आरोपींनी जबरदस्तीने गावडे यांच्या खिशातील २५,५०० रुपये रोख रक्कम हिसकावून घेतली. त्यांच्या हातातील चांदीच्या अंगठ्या, घड्याळ तसेच चालकाच्या कानातील सोन्याची बाळी कटरने काढून घेतली. एकूण सुमारे ५१,५०० रुपयांचा मुद्देमाल लुटण्यात आला. “पोलिसांना सांगितले तर जिवे मारू,” अशी धमकी देत आरोपी पसार झाले. Baramati News
या घटनेची माहिती मिळताच पोलिस निरीक्षक चंद्रशेखर यादव यांच्या नेतृत्वाखाली पथक सायंकाळी ५.२५ वाजता सक्रिय झाले. सायबर सेलच्या मदतीने आरोपींचा डिजिटल माग काढण्यात आला. टोल नाक्यांवरील सीसीटीव्ही फुटेज तपासून आरोपींची वेरना कार पाटसच्या दिशेने गेल्याचे स्पष्ट झाले. आरोपींनी पोलिसांना चकवण्यासाठी उंडवडी, शिरसुफळ, गाडीखेल, पारवडी, खडकी, रावणगाव, कुरकुंभ, भिगवण, कळस, डाळज, भाडलवाडी अशा विविध ठिकाणी सतत मार्ग बदलत पळ काढण्याचा प्रयत्न केला. मात्र पोलिसांनी प्रत्येक ठिकाणी समन्वय साधत जाळे आवळले.
थरारक पाठलाग आणि अटक
इंदापूर, भिगवण, वालचंदनगर पोलिसांना सतर्क करून नाकाबंदी लावण्यात आली. आरोपींनी पोलिसांचा पाठलाग सुरू असल्याचे लक्षात येताच गाडीचा वेग वाढवला. अखेर सिन्नरमास कंपनी परिसरात समोरून भिगवण पोलिस आणि मागून वालचंदनगर व बारामती पोलिसांनी घेराव घालत थरारक पाठलागानंतर रात्री सुमारे ८.५० वाजता तीन आरोपींना गाडीसह ताब्यात घेतले. चौथा आरोपी अतुल भोलणकर याला त्याच्या घरातून अटक करण्यात आली. Baramati News
ही धडाकेबाज कामगिरी पोलीस अधीक्षक संदीप सिंह गिल, अपर पोलीस अधीक्षक गणेश बिरादार, उपविभागीय पोलीस अधिकारी सुदर्शन राठोड यांच्या मार्गदर्शनाखाली पोलिस निरीक्षक चंद्रशेखर यादव, सहाय्यक पोलीस निरीक्षक विक्रम पवार, पोलीस उपनिरीक्षक धनश्री भगत, पोलीस हवालदार भारत खारतोडे, नितीन ढवण, जितेंद्र शिंदे, शशिकांत दळवी, दादा दराडे, सुरेंद्र वाघ, संतोष कांबळे, आफ्रिन शेख, वालचंद नगर पोलीस ठाण्याचे सहाय्यक पोलीस निरीक्षक राजकुमार डूणगे, पोलीस हवालदार गणेश काटकर, किसान बेलदार, अभिजित कळसकर, विक्रम मोरे, भिगवन पोलीस ठाण्याचे पोलीस उपनिरीक्षक अमित पाटील, पोलीस हवालदार महेश उगले, अपर पोलीस अधीक्षक कार्यालयातील सहाय्यक फौजदार गोरख पवार यांच्या पथकाने केली आहे.
