Baramati Crime News | बारामती, (पुणे) : शेअर मार्केटमध्ये माझ्याकडे रक्कम गुंतवल्यास चांगला नफा मिळवून देतो असे सांगत मोरगाव (ता. बारामती) येथील एका व्यक्तीची ४० लाख रुपये घेत फसवणूक केल्याची घटना घडली आहे. याप्रकरणी वडगाव निंबाळकर पोलिस ठाण्यात एकावर गुन्हा दाखल करण्यात आला.
विनय पुरुषोत्तम वर्टी (रा. डोंबिवली, जि. ठाणे) असे गुन्हा दाखल करण्यात आलेल्या व्यक्तीचे नाव आहे. या प्रकरणी हेरंब दिगंबर सासवडे (रा. मोरगाव, ता. बारामती) यांनी वडगाव निंबाळकर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, हेरंब सासवडे हे भांडी विक्रीचा व्यवसाय करून त्यावर उपजिविका करतात. दोन वर्षांपूर्वी कोरोना काळात त्यांचा व्यवसाय अडचणीत आल्याने ते साडू जीनदत्त हरीभाऊ झरकर (रा. खोपोली, ता. खालापूर, जि. रायगड) यांच्याकडे गेले होते. त्यावेळी साडूने त्यांची ओळख शिरिष मुकुंद बिवरे यांच्याशी करून दिली होती. बिवरे यांनी माझ्या ओळखीतील विनय वर्टी यांच्याकडे शेअर मार्केटमध्ये गुंतवल्यास ते गुंतवणूकदाराला चांगला मोबदला देतात, असे सांगितले होते. त्यानुसार वर्टी यांची भेट घालून देण्यात आली.
शेअर मार्केटमध्ये पैसे गुंतवण्यासाठी सासवडे यांनी मयुरेश्वर पतसंस्थेला घर गहाण ठेवून ५० लाख रुपयांचे कर्ज घेतले. त्यापैकी प्रत्येकी १५ लाखांचे दोन चेक, ५ लाख रुपये आरटीजीएसद्वारे व अन्य रक्कम वर्टी यांना रोखीने देण्यात आली. त्यानंतर महिन्याभराने फिर्यादीने वर्टी यांची भेट घेतली असता त्यांनी दोन लाख रुपये किमतीचे दोन चेक दिले. ते चेक फिर्यादीने भरले असता पुरेशी रक्कम नसल्याने वटले नाहीत. वर्टी यांना संपर्क केला असता त्यांनी खोपोलीत येण्यास सांगितले.
दरम्यान, सासवडे यांनी भेट घेतली असता ४ लाख रुपयांचा चेक त्यांना देण्यात आला. तो खात्यावर भरल्यावर बाऊन्स झाला. त्यानंतर वर्टी यांचा संपर्क बंद झाला. शिरिष बिवरे व अन्य लोकांनी संपर्क केला असता त्यांनीही वर्टी कुठे आहेत हे माहित नसल्याचे सांगितले. वर्टी हे भेटत नसल्याने आपली फसवणूक झाल्याचे फिर्यादीच्या लक्षात आले. त्यानंतर त्यांनी या प्रकरणी वडगाव निंबाळकर पोलिसांत फिर्याद दिली आहे.
