Ashok Kharat पुणे, ता. १० : नाशिकमधील भोंदू अशोक खरात प्रकरणाने राज्यातील राजकारणात मोठी खळबळ उडाली असून, काँग्रेसचे ज्येष्ठ नेते नाना पटोले यांनी केलेल्या गंभीर आरोपांमुळे हा वाद आणखी चिघळण्याची शक्यता निर्माण झाली आहे. अंधश्रद्धेच्या आड महिलांचा लैंगिक छळ आणि फसवणूक केल्याच्या आरोपाखाली अटक करण्यात आलेल्या अशोक खरात प्रकरणात राज्य मंत्रिमंडळातील चार मंत्र्यांचा थेट सहभाग असल्याचा दावा पटोलेंनी केला आहे. Ashok Kharat
या प्रकरणात समोर आलेल्या धक्कादायक व्हिडिओंमुळे राज्यभर संतापाची लाट उसळली होती. वाढत्या दबावानंतर राज्य सरकारने या संपूर्ण प्रकरणाच्या चौकशीसाठी विशेष तपास पथक (SIT) स्थापन केले आहे. मात्र तपास सुरू असतानाच नाना पटोलेंनी केलेल्या आरोपांमुळे राजकीय वातावरण तापले आहे.
पटोले म्हणाले, “अशोक खरातकडून महत्त्वाची माहिती मिळाल्यानंतर त्याचा जीव धोक्यात येऊ शकतो, अशी भीती आम्ही आधीपासून व्यक्त करत आहोत. विधानसभेतही हा मुद्दा मांडला होता. या प्रकरणात राज्य मंत्रिमंडळातील चार मंत्री सामील असल्याची माहिती आमच्याकडे आहे. यासंदर्भात आम्ही मुख्यमंत्र्यांना पत्र देणार असून संबंधित मंत्र्यांना तात्काळ मंत्रिमंडळातून हटवण्याची मागणी करणार आहोत.” Ashok Kharat
राज्यातील कायदा व सुव्यवस्थेवरही पटोलेंनी जोरदार टीका केली. “राज्यात गुंड, भोंदू बाबा आणि फसवणूक करणाऱ्यांचे फावले आहे. भीतीचं वातावरण उरलेलं नसल्याने अशा घटना सातत्याने घडत आहेत,” असा आरोप त्यांनी केला. तसेच अलीकडेच राष्ट्रवादी काँग्रेस शरदचंद्र पवार पक्षाचे प्रवक्ते विकास लवांडे यांच्यावर झालेल्या शाईफेक प्रकरणाचाही उल्लेख करत त्यांनी सरकारवर निशाणा साधला. Ashok Kharat
दरम्यान, “ते चार मंत्री कोण?” याची राज्यभर जोरदार चर्चा सुरू झाली आहे. अशोक खरातने स्वतःकडे दैवी शक्ती असल्याचा दावा करत अनेक महिलांना जाळ्यात ओढल्याचा आरोप आहे. काही महिलांनी पुढे येत त्याच्यावर लैंगिक अत्याचार आणि मानसिक छळाचे गंभीर आरोप केले आहेत. सोशल मीडियावर व्हायरल झालेल्या व्हिडिओंमुळे या प्रकरणाला आणखी गंभीर वळण मिळाले. Ashok Kharat
याचबरोबर काही व्यावसायिकांनीही खरातकडून आर्थिक फसवणूक झाल्याचा दावा करत तक्रारी दाखल केल्या आहेत. या वादात राज्य महिला आयोगाच्या माजी अध्यक्षा रुपाली चाकणकर यांचे नावही चर्चेत आले. विरोधकांकडून वाढलेल्या दबावानंतर त्यांनी आपल्या पदाचा राजीनामा दिला होता. Ashok Kharat
