Ashok Kharat : अध्यात्माच्या आडून महिलांचे शोषण केल्याचा आरोप असलेल्या अशोक खरात प्रकरणात तपास जसजसा पुढे सरकत आहे, तसतसे धक्कादायक तपशील समोर येत आहेत. प्रकरणाची गंभीरता लक्षात घेऊन स्थापन करण्यात आलेल्या विशेष तपास पथकाने (SIT) तपासाला वेग दिला असून, आता वैद्यकीय तपासणीचा महत्त्वाचा अहवालही समोर आला आहे.
पोलिसांनी खरातची पुण्यातील ससून रुग्णालय येथे सविस्तर वैद्यकीय तपासणी केली. अनेक महिलांच्या शोषणाच्या आरोपांच्या पार्श्वभूमीवर एचआयव्ही चाचणीसह विविध तपासण्या करण्यात आल्या होत्या. या चाचणीचा अहवाल निगेटिव्ह आल्याची माहिती समोर आली आहे. यामुळे संभाव्य आरोग्यधोक्याबाबत काही प्रमाणात दिलासा मिळाला असला, तरी गुन्ह्याची तीव्रता कमी होत नाही.
तपास यंत्रणांच्या मते, हा प्रकार केवळ फसवणुकीपुरता मर्यादित नसून मानसिक नियंत्रण आणि भीतीचा वापर करून महिलांना जाळ्यात ओढण्याचा प्रयत्न झाला असावा. काही तक्रारींनुसार, भविष्य सांगण्याचे आमिष, घरातील दोष दूर करण्याचे आश्वासन आणि संमोहनासारख्या पद्धतींचा वापर करून महिलांचे शोषण करण्यात आले.
या प्रकरणात आतापर्यंत 150 हून अधिक महिलांवर अत्याचार झाल्याचा संशय व्यक्त करण्यात आला आहे. मात्र, भीती आणि सामाजिक दबावामुळे अनेक महिला पुढे येण्यास तयार नसल्याचेही समोर आले आहे. न्यायालयाने या सर्व बाबींची दखल घेत आरोपीला 29 मार्चपर्यंत पोलीस कोठडी सुनावली आहे.
तपासाचा आणखी एक महत्त्वाचा भाग म्हणजे डिजिटल पुरावे. खरात हा व्हॉट्सअॅपवरील व्हॉइस मेसेजद्वारे संपर्क साधत असल्याचे उघड झाले आहे. सध्या सायबर तज्ज्ञांच्या मदतीने त्याच्या मोबाईलमधील डिलीट केलेला डेटा पुन्हा मिळवण्याचे काम सुरू आहे. या डेटामधून त्याचे संपर्क जाळे, संभाव्य सहकारी आणि पीडितांशी झालेले संभाषण उघड होण्याची शक्यता आहे.
