Gold and Silver Rate Today : रामनवमीच्या सुट्टीमुळे गुरुवारी (26 मार्च) देशांतर्गत सराफा आणि शेअर बाजार बंद असताना, जागतिक बाजारात मात्र मोठी हालचाल झाली. त्याचा थेट परिणाम शुक्रवारी (27 मार्च) भारतीय बाजारात दिसून आला सोने आणि चांदीच्या दरात लक्षणीय घसरण नोंदवली गेली.
या घसरणीमागे आंतरराष्ट्रीय घडामोडींचा मोठा वाटा आहे. इराण संकटावर तोडगा न निघाल्याने आणि होर्मुझ सामुद्रधुनीवरील तणाव वाढल्याने गुंतवणूकदारांनी सुरक्षित गुंतवणुकीत बदल केले. परिणामी जागतिक बाजारात सोन्याचा दर 4500 डॉलर प्रति औंस या महत्त्वाच्या पातळीखाली घसरून सुमारे 4413 डॉलरवर पोहोचला. चांदीतही विक्रीचा दबाव वाढत 70 डॉलरच्या खाली येऊन ती सुमारे 67 डॉलर प्रति औंसवर व्यवहार करत होती.
या घडामोडींचा परिणाम भारतातही दिसून आला. Indian Bullion and Jewellers Association (IBJA) च्या माहितीनुसार, शुक्रवारी सकाळी 24 कॅरेट सोन्याचा दर 146205 रुपये प्रति 10 ग्रॅम झाला. 22 कॅरेट सोने 145620 रुपये, 20 कॅरेट 133924 रुपये, 18 कॅरेट 109654 रुपये आणि 14 कॅरेट सोने 85530 रुपये प्रति 10 ग्रॅम या दराने विकले जात होते. चांदीचा दरही घसरून 234814 रुपये प्रति किलोवर आला.
या बदलामागे आणखी एक महत्त्वाचा घटक म्हणजे अमेरिकेतील व्याजदर धोरण. Federal Reserve कडून व्याजदर कपातीची शक्यता कमी झाल्याने डॉलर मजबूत होत आहे. डॉलर मजबूत झाला की सोन्यासारख्या धातूंवर दबाव वाढतो, कारण गुंतवणूकदार डॉलरकडे वळतात.
