लोणीकंद : लोणीकंद, चंदननगर, खडकी, मुंढवा, चाकण, कोपरगाव पोलीस ठाण्याच्या हद्दीतून चारचाकी व दुचाकी वाहने चोरी करणाऱ्या तीन अट्टल चोरट्यांना दरोडा व वाहन चोरी विरोधी पथक -2 च्या पथकाने जेरबंद केले आहे.
समाधान देविदास राठोड (वय- २२ रा. मु. पो. आंदरसुळ या. येवला, जि. नाशिक मुळ करंजी बोलकी, ता.कोपरगाव, जि. अहमदनगर), प्रकाश श्रीराम आढाव वय-३०, रा. शिक्षक कॉलनी, तळेगाव ढमढेरे, ता. शिरूर) आकाश बबन धोत्रे (वय-२७ रा. प्रथम सोसायटी आय बिल्डिंग फ्लॅट नंबर ४०३ तळेगाव ढमढेरे, ता. शिरूर) अशी अटक करण्यात आलेल्या आरोपींची नावे आहेत. त्यांच्याकडून पोलिसांनी १२ लाख ४० हजार रुपयांच्या चारचाकी वाहने व दोन दुचाकी जप्त करण्यात आल्या आहेत.
पोलिसांनी दिलेल्या माहितीनुसार, लोणीकंद पोलीस ठाण्याच्या हद्दीत दरोडा व वाहन चोरी विरोधी पथक -2 चे अंमलदार अमोल सरतापे, राहुल इंगळे व विनायक येवले गुन्ह्यांचा तपास करित असताना २०० ते २५० सीसीटीव्ही फुटेज त व तांत्रिक माहितीच्या आधारे वरील आरोपींना चौकशीसाठी ताब्यात घेतले. त्यांच्याकडे चौकशी केली असता त्यांनी लोणीकंद, चंदननगर, खडकी, मुंढवा, चाकण, कोपरगाव पोलीस ठाण्याच्या हद्दीतून चारचाकी व दुचाकी वाहने चोरी केल्याची कबुली दिली आहेत. त्यांच्याकडून पोलिसांनी २ लाख ४० हजार रुपयांच्या चारचाकी वाहने व दोन दुचाकी जप्त करण्यात आल्या आहेत.
सदरची कामगिरी दरोडा व वाहन चोरी विरोधी पथक -2 चे वरिष्ठ पोलीस निरीक्षक सुनिल पंधरकर यांचे मार्गदर्शनाखाली, सहायक पोलीस निरीक्षक विवेक पाडवी, पोलीस उप-निरीक्षक गुंगा जगताप, अंमलदार उदय काळभोर, राजेश अभंगे, दिनकर लोखंडे, विनायक रामाणे, अशोक आटोळे, दत्तात्रय खरपुडे, सुदेश सपकाळ, शिवाजी जाधव, गणेश लोखंडे, अमोल सरतापे, विनायक येवले, राहुल इंगळे, संदीप येळे, विक्रांत सासवडकर यांनी केली आहे.
