पुणे : ड्रग्स माफिया ललित पाटील हा ससून रुग्णालयातून पळून गेल्यापासून पुणे पोलिसांच्या कार्यपद्धतीवर प्रश्न उपस्थित केले जात आहेत. त्यानंतर पुणे पोलिसांकडून विशेष मोहीम राबवली जात आहे. त्यात आता पुण्यातील रोझरी स्कूलचा संचालक विनय अरहाना याला अटक करण्यात आली.
ललित पाटील याला अटक केल्यानंतर ड्रग्ज तस्कराचे मोठे रॅकेट उघड होत आहे. अटकेत असलेला ललित पाटील हा पोलिसांच्या तावडीतून पळून गेला होता. यामुळे पुणे पोलिसांच्या कार्यपद्धतीवर सवाल उपस्थित केले जात होते. त्यातून काही पोलिसांचे निलंबनही करण्यात आले होते. त्यातच काही दिवसांपूर्वी ललित पाटील याला मदत करणाऱ्या त्याच्या दोन मैत्रिणींना नाशिकमधून अटक केली.
असे असताना आता पुण्यातील रोझरी एज्युकेशन ग्रुपचा संचालक विनय अरहाना याला पुणे पोलिसांकडून अटक करण्यात आली. अरहाना याला यापूर्वी ईडीने अटक केली होती. सध्या तो येरवडा कारागृहात आहे. मात्र, त्याने ललित पाटील याला पळून जाण्यात मदत केल्याचे तपासात समोर आले. त्यानंतर पुणे पोलिसांनी त्याचा ताबा घेत त्याला अटक केली.
