पुणे : खेळात सहभागी करून न घेतल्याच्या कारणावरून झालेल्या वादातून शिक्रापूर येथील चाकण चौक परिसरातील तळेगाव रस्त्यावर तरुणांच्या दोन गटांमध्ये जोरदार मारामारी झाल्याची घटना घडली आहे. या प्रकरणी शिक्रापूर पोलिसांनी तातडीने कारवाई करत पाच आरोपींना बेड्या ठोकल्या आहेत. न्यायालयीन प्रक्रियेनंतर आरोपींना दोन दिवसांची पोलीस कोठडी सुनावण्यात आली आहे.
मिळालेल्या माहितीनुसार, क्रिकेटच्या खेळावरून मुलांमध्ये अचानक वाद सुरू झाला. या वादाचे रूपांतर नंतर मोठ्या भांडणात झाले. काही जणांनी बेकायदेशीर टोळके जमवून समोरील व्यक्तींना अर्वाच्य भाषेत शिवीगाळ करत धमक्या दिल्या. पाहता पाहता वाद वाढला आणि लाथाबुक्क्यांसह लाकडी बॅट व स्टंपचा वापर करून एकमेकांना जबर मारहाण करण्यात आली. या घटनेत काही जण जखमी झाले आहेत.
या संपूर्ण प्रकारानंतर शिक्रापूर पोलीस ठाण्यात दोन वेगवेगळे गुन्हे नोंदवण्यात आले आहेत. पोलिसांनी महाबळेश्वर नगर (शिक्रापूर, ता. शिरूर, जि. पुणे) येथील रहिवासी असलेल्या पाच जणांना अटक केली आहे. अटक करण्यात आलेल्या आरोपींची नावे खालीलप्रमाणे आहेत.मकसुद जाफरअली खान (वय 26),हमीद रियाज खान (वय 25),सलामत जाफरअली खान (वय 28),बिलाल बरकतअली खान (वय 22),जावेद मुस्ताक शहा (वय 22)
पोलीस प्रशासनाने या प्रकरणी भारतीय न्याय संहितेच्या (BNS) विविध कलमांनुसार (118(1), 115(2), 352, 351(2), 351(3), 3(5), 189(2), 190, 191(2)) गुन्हे दाखल केले आहेत.
पुणे ग्रामीणचे पोलीस अधीक्षक संदिपसिंह गिल्ल, अप्पर पोलीस अधीक्षक शुभम कुमार आणि शिरूरचे उपविभागीय पोलीस अधिकारी रविंद्र भोसले यांच्या मार्गदर्शनाखाली शिक्रापूरचे पोलीस निरीक्षक चंद्रशेखर यादव यांच्या पथकाने ही कारवाई केली. या तपासकार्यात पोलीस उपनिरीक्षक जिनेश कोळी, पोलीस हवालदार अमोल दांडगे, बापू हाडगळे, शिवाजी चितारे आणि पोलीस कॉन्स्टेबल नारायण वाळ यांनी महत्त्वपूर्ण भूमिका बजावली. पोलीस या प्रकरणाचा पुढील सखोल तपास करत आहेत.
