पुणे : केस कापण्यासाठी एका सलूनमध्ये गेलेल्या सात वर्षीय बालकासोबत अनैसर्गिक कृत्य केल्याची धक्कादायक घटना पुण्यात घडली असून सलूनमधील कामगारानेच हे घृणास्पद कृत्य केल्याचे समोर आले आहे. पोलिसांनी या कामगाराला अटक केली आहे.
सज्जन सहेआलम सलमानी (वय 20 वर्षे) असं अटक केलेल्या आरोपीचं नाव आहे. पीडित मुलाच्या वडिलांनी विमानतळ पोलीस ठाण्यात तक्रार दिली होती, त्यानुसार कारवाई करत पोलिसांनी कामगाराला बेड्या ठोकल्या.
संबंधित मुलाची आई सोमवारी (7 नोव्हेंबर) त्याला घेऊन केस कापण्यासाठी सलूनमध्ये गेली होती. परंतु सलूनमध्ये वेळ लागणार असल्याने ही महिला घरी गेली. याचा फायदा घेत गर्दी ओसरल्यानंतर कामगाराने या सात वर्षांच्या मुलाला आतील खोलीत नेत त्याच्यासोबत अश्लील चाळे करत अनैसर्गिक कृत्य केले.
या गोष्टीची वाच्यता केल्यास जीवे मारु अशी धमकीही कामगाराने मुलाला दिली. त्यानंतर या कामगाराने मुलाचे केस कापून त्याला घरी पाठवलं. बिथरलेल्या मुलाने सलूनमध्ये घडलेला प्रकार आपल्या आईला सांगितला. त्यानंतर हा प्रकार उघडकीस आला. मुलाच्या वडिलांनी विमानतळ पोलिसात संबंधित कामगाराविरोधात तक्रार दाखल केली.
याची दखल घेत पोलिसांनी सज्जन सलमानी याच्याविरुद्ध बालकांचे लैंगिक शोषण प्रतिबंधक कायद्यानुसार (पॉक्सो) गुन्हा दाखल केला. त्यानंतर पोलिसांनी आरोपीच्या मुसक्या आवळल्या.पोलीस या प्रकरणाचा अधिक तपास करीत आहेत.
