पुणे : कोथरुड येथील लक्ष्मीबाई नागरी पतसंस्थेत सुमारे पावणे दहा कोटींचा अपहार केल्याप्रकरणी संस्थेचे अध्यक्ष राजेंद्र पवार यांना अटक करण्यात आली आहे. तर संस्थेच्या संचालकांविरुद्ध एमपीआयडी अॅक्टनुसार फसवणुकीचा गुन्हा कोथरूड पोलीस ठाण्यात दाखल केला आहे.
लक्ष्मीबाई नागरी पतसंस्थेच्या व्यवस्थापिका रंजना दीपक निकम, नियंत्रक अभिजित भोसले, नियंत्रक वैशाली पवार, संचालक चंद्रशेखर दिनकर देशमुख व इतर ६ संचालक असे गुन्हा दाखल झालेल्यांची नावे आहेत. याप्रकरणी अप्पर विशेष लेखापरिक्षक जे एस गायकवाड यांनी कोथरुड पोलीस ठाण्यात फिर्याद दिली आहे. सदर प्रकार हा १ ऑगस्ट २०१५ ते ३१ मार्च २०२० या दरम्यान घडला आहे.
कोथरूड पोलिसांनी दिलेल्या माहितीनुसार, लक्ष्मीबाई नागरी सहकारी पतसंस्थेचे विशेष लेखापरिक्षण करण्याचे आदेश सहकार विभागाने दिले होते. त्यानुसार लेखा परिक्षण करण्यात आले. त्यात लक्ष्मीबाई नागरी पतसंस्थेतच्या २०१५ ते २०२० या कालावधीत संस्थेचे अध्यक्ष राजेंद्र पवार यांनी संस्थेतील निधी हा अनामत खात्याद्वारे स्वत:च्या फायद्याकरीता संचालक मंडळाची मंजुरी न देता पदाचा दुरुपयोग करुन घेतला.
संस्थेचे अध्यक्ष राजेंद्र पवार यांनी केलेल्या अपहरामुळे संस्था अडचणीत येणार आहे. ही बाब माहिती असून देखील इतरांनी निबंधक कार्यालयास कळविणे गरजेचे असताना सुद्धा कळविली नाही. तसेच नियंत्रक वैशाली पवार व अभिजित भोसले यांनी संगनमताने बोगस कर्ज नावे टाकून अपहार केला आहे.
दरम्यान, दुबेरजी व्यवहाराने अनामत येणे, खात्याची बाकी कमी करुन कमी व्याज आकारुन अपहार करणे, बँक उचल खात्यावर व्याज आकारणी न करुन अपहार करणे, तारण कर्ज याद्वारे संस्थेतील रक्कमेचा अपहार करणे अशा विविध प्रकारे गैरव्यवहार करुन ९ कोटी ७४ लाख ४० हजार १६९ रुपयांचा अपहार केल्याचे लेखा परिक्षणातून आढळून आले.
याप्रकरणी अपर विशेष लेखापरिक्षक जे एस गायकवाड यांनी कोथरुड पोलीस ठाण्यात फिर्याद दिली आहे. त्यानुसार संस्थेचे अध्यक्ष राजेंद्र पवार यांना अटक करण्यात आली आहे. तर संस्थेच्या संचालकांविरुद्ध एम पी आय डी अॅक्टनुसार फसवणुकीचा गुन्हा कोथरूड पोलीस ठाण्यात दाखल केला आहे.
पुढील तपास आर्थिक गुन्हे शाखेचे पोलीस निरीक्षक इंदलकर करीत आहेत.
