अहमदनगर : अहमदनरमधून एक मन सुन्न करणारी घटना घडली आहे. पारनेरमध्ये घराच्या जागेवरून सुरू असलेला वाद माय-लेकाच्या जीवावर बेतला आहे. शेजार्‍यांसोबत जागेवरून वाद झाल्याच्या रागातून मायलेकाच्या अंगावरून भरधाव वेगात कार घालून हत्या करण्यात आल्याचा धक्कादायक प्रकार घडला आहे.
शितल येनारे आणि स्वराज येनारे अशी मृतांची नावं आहेत. याप्रकरणी किरण श्रीमंदिलकर याच्याविरोधात गुन्हा दाखल करण्यात आला असून आरोपी सध्या फरार झाला आहे. मृतामध्ये अडीज वर्षाच्या मुलाचा समावेश आहे. या घटनेने अहमदनगर जिल्हा हादरून गेला आहे.
मिळालेल्या अधिक माहितीनुसार, अहमदनर जिल्ह्याच्या पारनेर शहरातील कुंभार गल्लीमध्ये येनारे कुटुंब राहत होते. हल्लेखोर आरोपी श्रीमंदिलकर त्यांच्या शेजारी राहत होता. घराच्या शेजारी असलेल्या जागेच्या मोजणीतून दोन्ही कुटुंबामध्ये वाद झाले होते. या वादातूनच ही हत्या करण्यात आल्याचा आरोप येनारे कुटुंब करत आहे.
गुरूवार 23 नोव्हेंबर ला संध्याकाळी हा प्रकार घडल्याची प्राथमिक माहिती आहे. भरधाव वेगात चारचाकी गाडी नेत त्याने शितल आणि स्वराज यांच्या अंगावर घातली. यामध्ये त्यांचा जागीच मृत्यू झाला. या घटनेने परिसरात एकच खळबळ उडाली आहे.
