Accident वेल्हे, (पुणे) : भरधाव दुचाकीवरून निघालेल्या तरुणाचे दुचाकीवरील नियंत्रण सुटून झालेल्या अपघातात एकजण जागेवरच ठार, तर एकजण गंभीर जखमी झाल्याची घटना घडली आहे. हा अपघात रविवारी (ता. ०२) सायंकाळी सहा वाजण्याच्या सुमारास करंजावणे (ता. वेल्हे) ग्रामपंचायत हद्दीत घडला.
किशोर व्यंकट गोरे (वय. ४०, रा. सावरकर चौक, धनकवडी, पुणे) असे अपघातात मृत्यूमुखी पडलेल्या व्यक्तीचे नाव आहे. तर त्याचा साथीदार साहिल रजनीकांत ओनावळे (वय – २७) रा. पुणे) असे अपघातात जखमी झालेल्या तरुणाचे नाव आहे.
पोलिसांनी दिलेल्या माहितीनुसार…!
पुण्याहून भाघिनगरच्या दिशेने रंगकाम करण्यासाठी तरुण निघाला होता. त्या दरम्यान, रविवारी सायंकाळी सहा वाजण्याच्या सुमारास करंजावणे (ता. वेल्हे) ग्रामपंचायत हद्दीतील हॉटेल तोरणाच्या पुढच्या वळणावर एक दुचाकी धडकली.
अपघाताची माहिती समजताच पोलीस ठाण्याचे पोलीस हवालदार प्रदीप कुदळे तात्काळ घटनास्थळी धाव घेतली. कुदळे यांनी तात्काळ वेल्हा ग्रामीण रुग्णालयाशी संपर्क साधला. अपघातग्रस्त व्यक्तींची तपासणी केली असता किशोर गोरे यांचा जागीच मृत्यू झाल्याची माहिती वैद्यकीय अधिकारी शिवाजी कुरणकर यांनी दिली. तर ओनावळे याच्यावर उपचार सुरु आहेत. तपास वेल्हे पोलीस करीत आहेत.
