पुणे : पु्ण्यात दिवसेंदिवस गुन्हेगारीच्या घटना वाढताना दिसत आहेत. त्यात आता नऱ्हे येथील अभिनव कॉलेजजवळील परफेक्ट अॅटो हब येथे एका तरुणाला हातपाय बांधून बेदम मारहाण करण्यात आली. ऑफिसमधील चॅटिंगच्या वादातून हा प्रकार झाला. याप्रकरणी पोलिसांनी गुन्हा दाखल केला असून, दोन सराईत गुन्हेगारांसह तिघांना अटक केली आहे.
ऋतिक बाळकृष्ण बानकर (वय 23 रा. खडकवासला) याने सिंहगड रोड पोलीस ठाण्यात फिर्याद दिली आहे. या फिर्यादीवरून पोलिसांनी विक्रम गणपत निवंगुणे (वय 28 रा. जेएसपीएम कॉलेज जवळ, नऱ्हे), सुनिल दगडु निवंगुणे (वय 31 रा. विराज रेसीडेन्सी, नऱ्हे), अजित लक्ष्मण कडू (वय 31), आकाश रायकर, समीर पोकळे, दाद्या निवंगुणे, अजित कटू याचा मित्र (नाव पत्ता माहित नाही) यांच्यावर विविध कलमांन्वये गुन्हा दाखल करण्यात आला आहे.
ऋतिक बानकर हा परफेक्ट अॅटो हब येथे सेल्समन म्हणून कामाला आहे. त्याने ऑफिसच्या पगारासंदर्भात आणि अर्जुन निवंगुणे याचे ऑफिसमधील महिलेसोबत असलेल्या प्रेम प्रकरणाबाबत ऑफिसमधील सहकारी दीपक वर्मा याच्यासोबत व्हॉट्सअॅवर चॅटिंग केले होते. याच चॅटिंगबाबत आरोपी समीर पोकळे याने आरोपींना फोन करुन माहिती दिली. त्यानंतर आरोपींनी ऋतिकचे हात-पाय बांधून लाकडी बांबू, प्लास्टिक पाईप व बेल्टने मारहाण केली.
