यवत : यवत ग्रामपंचायत हद्दीतील पालखीतळ परिसरात एका व्यक्तीचा खून झाल्याची घटना बुधवारी (ता. २७) सकाळी अकरा वाजण्याच्या सुमारास उघडकीस आली आहे. रक्ताच्या थारोळ्यात मृतदेह आढळून आल्याने यवतसह परिसरात एकच खळबळ उडाली आहे.
संजय सखाराम बनकर (मूळ रा. सोलापूर) असे खून झालेल्या व्यक्तीचे नाव आहे.
यवत पोलीस ठाण्याचे वरिष्ठ पोलीस निरीक्षक नारायण पवार यांनी दिलेल्या माहितीनुसार, बुधवारी सकाळी अकरा वाजण्याच्या सुमारास यवत ग्रामपंचायत हद्दीत एका इसमाचा पोटात वार करून खून झाला आहे. अशी माहिती पोलिसांना मिळाली होती. या घटनेची माहिती मिळताच यवत पोलिसांनी घटनास्थळी धाव घेतली.
यवत मधील लोकवस्तीत हा प्रकार घडला असल्याने परिसरात भीतीचे वातावरण निर्माण झाले आहे. मयत संजयचे नातेवाईक खामगाव तांबेवाडी (ता. दौंड) येथे राहत असून हा खुन नेमका कोणत्या कारणामुळे घडला आहे. याचा तपास यवत पोलीस घेत आहेत. घटनास्थळी यवतचे पोलीस निरीक्षक नारायण पवार, उपनिरीक्षक संजय नागरगोजे, पद्मराज गम्पले, सुजित जगताप यांनी भेट दिली असुन तपास सुरु आहे. तर सबंधित घटनेचे गुन्हा दाखल करण्याचे काम सुरु असल्याचे पवार यांनी सांगितले.
