पुणे : पीएमटी आणि पीएमपीएमएल बसमध्ये गर्दीचा फायदा घेऊन प्रवाशांना लुटणाऱ्या दोघांना पुणे पोलिसांच्या गुन्हे शाखा युनिट एकच्या पथकाने बेड्या ठोकल्या आहे. पाच गुन्ह्यातील 96 हजार रुपये किमतीचा मुद्देमाल आरोपींकडून जप्त करण्यात आला आहे. ही कारवाई बुधवार चौकाजवळ असलेल्या बस स्टॉपवर सापळा रचून करण्यात आली आहे.
अविनाश उर्फ चार्ली सिद्राम जाधव (वय-32 रा. जनसेवा बँकेजवळ, केशवनगर, मुंढवा, पुणे), आदर्श नारायण गायकवाड (वय-31 रा. महादेव मंदीराजवळ, मुंढवा, पुणे) असे अटक करण्यात आलेल्या आरोपींची नावे आहेत.
मिळालेल्या माहितीनुसार, बुधवार चौकाजवळील बस स्टॉपवर गर्दीचा फायदा घेत प्रवाशांना लुटण्यासाठी दोन जण येणार असल्याची माहिती युनिट एकच्या पथकाला मिळाली. पथकाने सापळा रचून दोघांना ताब्यात घेतले. त्यांची चौकशी केली असता, मागील एक वर्षात बस स्टॉपवर व बसमध्ये प्रवास करणाऱ्या प्रवाशांचे पैसे चोरल्याचे निष्पन्न झाले.
तसेच त्यांनी शिवाजी रोड, भापकर पेट्रोल पंप ते सातारा रोड, नऱ्हे ते हुजुरपागा, कात्रज ते महाराष्ट्र हौसिंग बोर्ड, आळंदी ते विश्रांतवाडी, काळेवाडी ते विद्यापीठ, पुणे स्टेशन ते वाघोली या मार्गावर प्रवाशांना लुटल्याची कबुली दिली. आरोपींकडून फरासखाना, खडक, सहकारनगर, येरवडा, चतु:श्रृंगी पोलीस ठाण्यातील प्रत्येकी एक असे एकूण पाच गुन्हे उघडकीस आले आहेत.
दरम्यान आरोपीना फरसाखाना पोलिसांच्या ताब्यात देण्यात आले आहे. ही कारवाई पोलीस आयुक्त अमिताभ गुप्ता, सहपोलीस आयुक्त संदीप कर्णिक, अपर पोलीस आयुक्त गुन्हे रामनाथ पोकळे, पोलीस उपायुक्त गुन्हे अमोल झेंडे, सहायक पोलीस आयुक्त गुन्हे -१ गजानन टोम्पे, यांच्या मार्गदर्शनाखाली पोलीस निरीक्षक संदीप भोसले, सहायक पोलीस निरीक्षक आशिष कवठेकर यांनी केली आहे.