पुणे : रिक्षाचालक आणि दुचाकीस्वार यांच्यात गाडी घासल्याने झालेल्या वादातून दुचाकीस्वार तरुणाने केलेल्या मारहाणीत रिक्षाचालकाला मृत्यू झाल्याची घटना घडली आहे. ही घटना सातारा रोडवरील भापकर पेट्रोल पंपाजवळ सोमवारी (ता. ६) रात्री सव्वाअकरा वाजता घडली आहे. खून केल्यानंतर पसार झालेल्या दोघांना दत्तवाडी पोलिस ठाण्याच्या पथकाने काही तासांच्या आत बेड्या ठोकल्या आहेत.
मुकील गफूर शेख (रा. कोंढवा) आणि अरबाज मेहबूब शेख (रा. कासेवाडी) अशी अटक करण्यात आलेल्या आरोपींची नावे आहेत. तर, किरण राजू दांडेकर (वय ३०, रा. पर्वती दर्शन) असे खून झालेल्या रिक्षाचालकाचे नाव आहे. याप्रकणी मृत किरण यांचा भाऊ मधुकर राजू दांडेकर याने दत्तवाडी पोलिस ठाण्यात फिर्याद दिली.
पोलिसांनी दिलेल्या माहिती नुसार, सोमवारी (ता.६) रात्री सव्वा अकरा वाजण्याच्या सुमारास किरण दांडेकर, त्याचा भाऊ मधूकर दांडेकर, बंटी कसबे, निलबा, राजू हे किरणच्या रिक्षातून गॅस भरण्यासाठी भापकर पेट्रोल पंपाकडे जात होते. त्यावेळी दुचाकीवर असलेल्या आरोपी मुकील आणि आरबाज यांच्या दुचाकीला रिक्षा घासल्याने आरोपी आणि किरण यांच्यात वाद झाले.
त्याच्या वादाचे रुपांतर मोठ्या भांडणात झाले. यावेळी चाललेल्या भांडणात आरोपीपैकी एकाने किरणच्या छातीवर जोरात लाथ मारली. तो बेशुध्द होऊन खाली पडला. त्यानंतर, त्याला रूग्णालयात दाखल करण्यात आल्यानंतर उपचारपूर्वीच किरणचा मृत्यू झाल्याचे डॉक्टरांनी घोषित केले.
या दरम्यान आरोपी घटनास्थळावरून पसार झाले. पोलिस ठाण्यात गुन्हा दाखल होऊन तपासात माहिती मिळालेल्या आरोपींच्या दुचाकीच्या चार अंकी नंबरवरून पोलिसांनी काही तासांच्या आत लपून बसलेल्या आरोपींना बेड्या ठोकल्या.
या घटनेचा पुढील तपास पोलीस करीत आहेत.
