दिनेश सोनवणे
दौंड : तरुणीचा विनयभंग करून कुटुंबियांना बेदम मारहाण केल्याप्रकरणी दौंडचे माजी नगराध्यक्ष बादशाह शेख यांच्यासह २० जणांवर ॲट्रॉसिटीसह विनयभंगाचा गुन्हा दाखल करण्यात आला आहे.
दौंडचे माजी नगराध्यक्ष बादशाह शेख, राशीद इस्माईल शेख, वाहीद खान, आरबाज सय्यद, जुम्मा शेख, ईलास इस्माईल शेख, वसीम शेख, जिलाणी शेख व इतर १० ते १२ इसम (सर्व रा. कुंभारगल्ली, दौंड, ता. दौंड, जि. पुणे) यांच्याविरोधात दौंड पोलीस ठाण्यात गुन्हा दाखल झाला आहे. याप्रकरणी पिडीत तरुणीने पोलीस ठाण्यात फिर्याद दिली आहे.
दौंड पोलीस ठाण्याचे वरिष्ठ पोलीस निरीक्षक विनोद घुगे यांनी दिलेल्या माहितीनुसार, फिर्यादी पिडीत तरुणी या कुंभारगल्ली येथील गिरणीत दळण ठेवण्यासाठी २० ऑक्टोंबर रोजी संध्याकाळी सात वाजण्याच्या सुमारास गेली होती. दळण ठेवल्यानंतर फिर्यादी माघारी येत असताना, आरोपींनी फिर्यादी यांची पंजाबी ड्रेसवरील ओढणी ओढून एकमेकांकडे टाकली. आणि फिर्यादी यांच्या मनास लज्जा उत्पन्न होईल असे कृत्य केले. फिर्यादी “घाबरून घरी पळत गेल्या व घरी जावून नातेवाईकांना हि बाब सांगितली.
त्यानंतर फिर्यादी व तिचे दोन भाऊ आरोपी राषीद शेख याला विचारणा करण्यासाठी गेले असता, आरोपींनी तिघांनाही दांडक्याने मारहाण करण्यास सुरवात केली. तेव्हा फिर्यादी व तिचे दोन भाऊ तेथून पळून घरी गेले. त्यानंतर आरोपी हातात तलवारी, कोयते घेवून घरासमोर आले. व त्यापैकी काही आरोपी घरात घुसले. आरोपींनी मारहाण करून कुटुंबाला जीवे ठार मारण्याची धमकी दिली.
दरम्यान, सदर घटनेच्या वेळी आरोपींनी दमदाटी करताना जातीवाचक शिवीगाळ केली. तसेच घरातील सामानाची तोडफोड केली. तसेच घरावरील सिमेंटचा पत्रा फोडून नुकसान केले आहे व घरासमोर लावलेल्या मोटारसायकलचेही नुकसान केले आहे. त्यानंतर तिन्ही कुटुंबीय औषधोपचार करून भिती पोटी नातेवाईकांकडे घर सोडून गेले होते.
याप्रकरणी पिडीत तरुणीने दौंड पोलीस ठाण्यात फिर्याद दिली आहे. त्यानुसार दौंडचे माजी नगराध्यक्ष बादशाह शेख यांच्यासह २० जणांवर ॲट्रॉसिटीसह विनयभंगाचा गुन्हा दाखल करण्यात आला आहे. पुढील तापस दौंड पोलीस करीत आहेत.
