इंदापूर, (पुणे) : शेतात संध्याकाळी काम करीत असताना काटी (ता. इंदापूर) येथील एका २२ वर्षीय तरुणाच्या अंगावर वीज पडून जागीच मृत्यू झाल्याची दुर्दैवी घटना घडली आहे. मंगळवारी (ता. ०७) सायंकाळी सहा वाजण्याच्या सुमारास ही घटना घडली.
ओंकार दादाराम मोहिते (वय- २२, रा. काटी, ता. इंदापूर) असे मृत्यू झालेल्या तरुणाचे नाव आहे. तो कुटुंबातील एकुलता मुलगा असल्याने परिसरात हळहळ व्यक्त केली जात आहे.
मिळालेल्या माहितीनुसार, शहरात ढगाळ वातावरण कायम असून विजांचा कडकडाट, वादळी वाऱ्यासह हलक्या स्वरूपाचा पाउस येत होता. यावेळी काटीत रात्री दोन ठिकाणी वीज कोसळली. यावेळी ओंकारचा टी शर्ट जळालेल्या अवस्थेत आढळल्याने गावकऱ्यांना वीज अंगावर पडून त्याचा मृत्यू झाल्याचा अंदाज व्यक्त केला जात आहे. उपचारासाठी दवाखान्यात दाखल करण्यात आले होते, मात्र डॉक्टरांनी त्याला उपचारापूर्वीच मृत झाल्याचे सांगितले.
दरम्यान, ओंकार हा पोलिस भरतीची तयारी करीत होता. तसेच दादाराम मोहिते यांना ओंकार व दोन मुली आहेत. काटीत एका नारळाच्या झाडावरही वीज कोसळली. त्यामुळे वीज कोसळल्यानेच ओंकारचा मृत्यू झाला असल्याचा अंदाज ग्रामस्थांनी वर्तवला आहे. त्याच्या जाण्याने काटीसह परिसरात हळहळ व्यक्त केलेई जात आहे.
