पुणे : गुन्हे शाखेच्या अंमली पदार्थ विरोधी पथकाने पुण्यातील बंडगार्डन रस्ता, मार्केट यार्ड, कोरेगाव पार्क भागात धाड टाकून, साडे नऊ लाखाच्या अंमलीपदार्थासह तीन जणांना अटक केली आहे.
सुरेश सिद्धराम नाटेकर (वय ३३, गंगाधाम, मार्केट यार्ड) आकाशचंद्र पार्थव नायक (वय ३७, रा. ओदिशा) आणि जावेद अजीज सय्यद (वय ३३, रा. मीठानगर, कोंढवा) अशी अटक करण्यात आलेल्या आरोपींची नावे आहे.
अंमली पदार्थ विरोधी पथकाचे वरिष्ठ पोलीस निरीक्षक सुनील थोपटे यांनी दिलेल्या माहितीनुसार, पहिल्या घटनेत अंमली पदार्थ विरोधी पथक मार्केट यार्ड परिसरात गस्त घालत असताना, पोलिसांना मार्केट यार्ड येथे आरोपी सुरेश नाटेकर हा चरस विक्री करताना आढळून आला. पोलिसांनी त्याला ताब्यात घेतले. त्याची अंगझडती घेतली असता, त्याच्याकडून २ लाख ३१ हजारांचे २३१ ग्रॅम चरस जप्त करण्यात आले.
दुसऱ्या घटनेत, पुणे रेल्वे स्थानक परिसरात एकजण मेफेड्रोन विक्री करण्यासाठी येणार असल्याची माहिती अंमली पदार्थ विरोधी पथकाला मिळाली. त्यानंतर पथकाने सापळा रचून आरोपी जावेद सय्यद याला पकडले. त्याच्याकडून दोन लाख १० हजारांचे मेफेड्रोन जप्त करण्यात आले.
तिसऱ्या घटनेत अंमली पदार्थ विरोधी पथकाला कोरेगाव पार्क भागात अमली पदार्थ विक्री प्रकरणात आकाशचंद्र नायक याला ताब्यात घेण्यात आले. त्याच्याकडून चार लाख ८३ हजार रुपये किंमतीचा २४ किलो गांजा जप्त करण्यात आला.
ही कारवाई अंमली पदार्थ विरोधी पथकाचे वरिष्ठ पोलीस निरीक्षक सुनील थोपटे यांच्या मार्गदर्शनाखाली उपनिरीक्षक एस. डी. नरके, मयूर सूर्यवंशी, चेतन गायकवाड, साहिल शेख, आझीम शेख आदींनी ही कारवाई केली.
