जेजुरी- २ कोटी १३ लाख ६६ हजार रुपयांचा आर्थिक अपहार केल्याची घटना जेजुरी येथील गणेश नागरी सहकारी पतसंस्थेत घडली. याबद्दल पुणे विभागातील लेखापरीक्षक श्रेणी-2 चे ईरण्णा चंद्रकांत सावळगी यांनी जेजुरी पोलिस ठाण्यात तक्रार दिली.
मिळालेल्या माहितीनुसार संस्थेचे अध्यक्ष व संचालक मंडळ, व्यवस्थापक, कर्मचारी आदींनी सहमताने सभासद ,खातेदार, ठेवीदारांचा विश्वासघात करीत मोठा आर्थिक गैरव्यवहार केला असून, त्यांच्यावर विविध कलमांतर्गत गुन्हे दाखल केले आहेत.
फिर्यादीनुसार या पतसंस्थेचे अध्यक्ष नरेंद्र बाबूराव जगताप, सचिव छाया यशवंत पवार, खासगी लेखापरीक्षक यशवंत बबन पवार, व्यवस्थापक अश्विनी सुरेश धुमाळ तसेच कर्जदार शरद दत्तात्रय शेळके, ज्ञानेश्वर जयवंत मांढरे, विजय वसंत दरेकर, विश्वनाथ कृष्णा पवार, गणेश चंद्रकांत पवार, नवनाथ एकनाथ पवार, संदीप शंकर दुर्गाडे, दत्तात्रय अण्णासाहेब राणे, सुरेश कृष्णाजी धुमाळ, संदीप एकनाथ पवार, सचिन रामचंद्र दुर्गाड़े, महादेव श्रीपती शेडगे, तसेच खासगी लेखापरीक्षक अमीर रशीदभाई बागवान, सुरेश रामचंद्र शिंगटे आणि शिवाजी ज्ञानेश्वर घारे या १९ जणांवर आर्थिक फसवणूक व अपहाराचा ठपका ठेवण्यात आला आहे.
संस्थेचे अध्यक्ष व संचालकांनी कटकारस्थान करून खोटे, बनावट ठराव करणे, खोटी कर्ज प्रकरणे दाखविणे, खोटे व बनावट लेखापरीक्षण करून शासनाची फसवणूक करणे, रोज च्या व्यवहारात खोट्या व बनावट नोंदी करणे, ठेवीदारांच्या खोट्या नोंदी करून फसवणूक करणे आदी गुन्ह्यांतर्गत लेखापरीक्षकांनी जेजुरी पोलिसांत फिर्याद दाखल केली आहे.
