पुणे : प्रेयसीच्या जाचाला कंटाळून विवाहित तरुणाने नदीत उडी मारून आत्महत्या केल्याची घटना घडली आहे. याप्रकरणी आत्महत्या केलेल्या तरुणाच्या आईने येरवडा पोलीस ठाण्यात फिर्याद दिली आहे.
हरिश प्रेमकीशन पवार (वय २७) असे आत्महत्या केलेल्या तरुणाचे नाव आहे. प्रेयसीविरूद्ध येरवडा पोलिसांनी गुन्हा नोंद करून तिला अटक करण्यात आली आहे.
पोलिसांनी दिलेल्या माहितीनुसार, हरिश खासगी कंपनीत नोकरी करत होता. काही महिन्यांपुर्वी त्याचे लग्न झाले होते. मात्र, त्याला एका तरूणीने प्रेमाच्या जाळ्यात ओढला गेला. त्यानंतर प्रेयसीने हरिशच्या पत्नीला फोन करून दोघांमध्ये दुरावा आणला. त्यानंतर ती वारंवार हरिशवर दबाव आणून तु मर, मला तुझे मेलेले तोंड बघायचे असे म्हणून त्याला वारंवार त्रास देत होती.
दरम्यान, प्रेयसीचा मानसिक त्रास सहन न झाल्याने हरिशने आगाखान ब्रिजवरून नदीत उडी मारून आत्महत्या केली. याप्रकरणी हरिशच्या आईने येरवडा पोलीस ठाण्यात फिर्याद दिली आहे.
त्यानुसार पोलिसांनी प्रेयसीची चौकशी करून तिला अटक केली आहे. या घटनेचा पुढील तपास पोलीस करीत आहेत.
