जालना : गेल्या काही दिवसांपासून राज्यात अपघाताचे सत्र सुरुच आहे. अशातच जालन्यामधून भीषण अपघाताची बातमी समोर आली आहे. भरधाव आयशरने धडक दिल्याने माय-लेकींसह तिघांचा मृत्यू झाल्याची घटना जालनाा जिल्ह्यातील मंठा शहरात घडली आहे. या भीषण अपघातानंतर आयशर चालक फरार झाला असून पोलीस चालकाचा शोध घेत आहेत.
याघटनेबाबत अधिक माहिती अशी की, मंठा शहरातील देवी रोडवर शाळेतून घरी जाणाऱ्या मायलेकीसह, सहा वर्षीय मुलगी आणि एका ज्येष्ठ नागरिकाला भरधाव वेगाने जाणाऱ्या आयशर ट्रकने जोरदार धडक दिली. या अपघातात सहा वर्षीय मुलगी, महिला आणि एका ज्येष्ठ नागरिकाचा उपचारादरम्यान दुर्देवी अंत झाला आहे.
यावेळी अपघातात मृत्यू झालेल्यांची नावे सीमा चव्हाण (वय- 24), मारिया पठाण (वय- 6) आणि रूपला राठोड (वय 65) असे आहे. तर या घटनेत इशिका चव्हाण ही चार वर्षाची चिमुकली जखमी झाली आहे. या अपघातानंतर आयशर चालकाने घटनास्थळावरुन फरार झाला असून पोलीस त्याचा शोध घेत आहेत. पोलिसांनी चालकाला ताब्यात घेऊन त्याला कडक शिक्षा करावी, अशी मागणी स्थानिकांनी केली आहे.
