– संतोष पवार
पळसदेव (पुणे) : इंदापूर तालुक्यातील उजनी पाणलोट क्षेत्रातील असणाऱ्या पुर्नवसित डिकसळ गावच्या उपसरपंचपदी मंदा विजय शिंदे यांची बिनविरोध निवड करण्यात आली आहे.
जयश्री सवाने यांनी उपसरपंच पदाचा राजीनामा दिल्यानंतर रिक्तपदाच्या निवडीसाठी ग्रामपंचायत सदस्यांची गावच्या सरपंच मनिषा गवळी यांच्या अध्यक्षतेखाली बैठक बोलावण्यात आली होती. यावेळी उपसरपंच पदासाठी मंदा शिंदे यांचा एकमेव अर्ज आल्याने त्यास उपस्थित सदस्यांनी मान्यता देली. त्यानंतर मंदा शिंदे यांची बिनविरोधपणे निवड करण्यात आली. मंदा शिंदे यांची बिनविरोधपणे निवड झाल्याचे ग्रामसेवक तथा निवडणूक निर्णय अधिकारी प्रतिभा देवकाते यांनी जाहीर केले.
यावेळी डिकसळ ग्रामपंचायतीच्या विद्यमान सरपंच मनिषा गवळी, ग्रामपंचायत सदस्य संदीप भोंग, दत्ता पवार, मनीषा पवार जयश्री सवाने, ज्ञानेश्वरी कुंभार आदी उपस्थित होते.
उपसरपंचपदी निवड झाल्यानंतर मंदा शिंदे यांनी गावच्या विकासासाठी आपण प्रयत्नशील राहणार असल्याचे स्पष्ट केले. उपसरपंच निवडीनंतर ग्रामदैवत योगेश्वरी मंदिरात मंदा शिंदे यांचा डिकसळ ग्रामस्थांच्या वतीने सन्मान करण्यात आला.
