बारामती : बारामती येथील फलटण रस्त्यावर असलेल्या टाटा शोरूममध्ये एका कामगाराचा चक्कर येऊन खाली पडल्याने मृत्यू झाल्याची घटना घडली आहे. ही घटना १८ जुलै रोजी दुपारी साडे चार वाजण्याच्या सुमारास टाटा शोरूम बारामती-फलटण रोड येथे घडली. सचिन दादासो कुंभार (वय-१८, रा. तांदुळवाडी, ता. बारामती, जि पुणे) असे मृत्यू झालेल्या तरुणाचे नाव आहे.
याबाबत साहिल शब्बीर सय्यद (वय-२४, धंदा खाजगी नोकरी, रा. संघवीपार्क) यांनी बारामती शहर पोलीस ठाण्यात फिर्याद दिली आहे. त्यावरून पोलिसांनी अकस्मात मृत्यूची नोंद केली आहे.
पोलिसांनी दिलेल्या माहितीनुसार, बारामती फलटण रोड येथे टाटाचे शोरूम आहे. फिर्यादी साहिल सय्यद हे १८ जुलै रोजी दुपारी साडे चार वाजण्याच्या सुमारास नेहमीप्रमाणे टाटा शोरूम येथे वॉशिंग सेंटरमध्ये काम करत होते. दरम्यान, आमच्याकडे दोन दिवसापासुन ट्रायल बेसवर काम करणारा सचिन कुंभार हा वॉशिंग मशीनची गन हातात घेऊन उभा होता.
त्यावेळी त्याला अचानक चक्कर आल्याने तो खाली कोसळला. यावेळी आम्ही सर्व कामगारांनी त्याच्याकडे धाव घेत सचिनला बारामती येथील एका रुग्णालयात उपचारासाठी दाखल केले. मात्र, डॉक्टरांनी तपासून सचिनला मृत घोषित केले. पुढील तपास बारामती शहर पोलीस करत आहेत
