दौलताबाद : धुळे-सोलापूर महामार्गावर कार आणि ट्रकचा भीषण अपघात झाला आहे. फतियाबाद गावाजवळ कारने ट्रकला पाठीमागून जोरदार धडक दिल्याने तिघांचा जागीच मृत्यू झाला, तर दोनजण गंभीर जखमी झाल्याची घटना घडली आहे.
ही घटना शनिवारी ०६ जुलै रोजी पहाटे पाच वाजण्याच्या सुमारास घडली. हा अपघात इतका भीषण होता कि, यामध्ये कारच्या पुढील भागाचा चक्काचूर झाला आहे. राजू आसाराम उचित (वय-६०), अलकाबाई राजू उचित (वय-५५), अर्जुन राजू उचित (वय-२५) अशी अपघातात मृत्यू झालेल्यांची नावे आहेत,
पोलिसांनी दिलेल्या माहितीनुसार, राजू उचित पत्नी अलकाबाई, मुलगा अर्जुन आणि मुलगी तसेच जावई यांच्यासोबत कन्नड तालुक्यातील अंधानेर येथे बाळूमामा यांच्या मेंढ्यांचे दर्शन घेण्यासाठी गेले होते. दर्शन करून घरी परताना त्यांच्या कारने ट्रकला पाठीमागून जोरदार धडक दिली. या धडकेत पती-पत्नीसह मुलाचा मृत्यू झाला.
या अपघाताची माहिती मिळताच पोलिसांनी घटनास्थळी धाव घेत जखमींना खाजगी रूग्णालयात दाखल केले. मात्र, डॉक्टरांनी तपासून राजू उचित, अलकाबाई राजू उचित, व अर्जुन राजू उचित यांना मृत घोषित केले. तर गंभीर जखमी अवस्थेत असलेल्या राजू उचित यांची मुलगी व जावई यांच्यावर खाजगी रुग्णालयात उपचार सुरू आहेत. सदर घटनेची नोंद दौलताबाद पोलीस ठाण्यात करण्यात आली असून पुढील तपास पोलीस उपनिरीक्षक कृष्णा घायाळ करीत आहे.
