नाशिक : गंगापूर धरण परिसरात असलेल्या गोदापात्रात काल मध्यरात्री एक चारचाकी वाहन थेट पुलावरून नदीत कोसळून अपघात घडला आहे. हा अपघात प्रचंड भीषण होता. मागील पंधरा दिवसातील हा तिसरा अपघात आहे. या अपघातामध्ये चारचाकीमधील एकाचा मृत्यू झाला तर दोन गंभीर जखमी झाल्याची माहिती समोर आली आहे.
मिळालेल्या माहितीनुसार, नाशिकच्या गंगापूर रोड परिसरात असलेल्या गंमत जंमत हॉटेलजवळ काल मध्यरात्री एका कारचा भीषण अपघात झाला. कार पुलाचे कठडे तोडून थेट गोदावरी नदीपात्रात कोसळली. या भीषण अपघातात एकाचा मृत्यू तर दोन जण जखमी झाले आहेत. घटनेची माहिती मिळताच पोलीस घटनास्थळी दाखल झाले. उपचारासाठी जखमींना नाशिकच्या खाजगी रुग्णालयात दाखल करण्यात आले आहे.
रात्रीच्या वेळी अपघाताच्या घटना
दरम्यान, ही घटना रात्रीच्या सुमारास घडली आहे. गंगापूर धरण, कशप्पी धरण या ठिकाणी अनेक पर्यटक पर्यटनासाठी येत असतात. रात्रीच्या वेळी अशा गंभीर अपघाताच्या घटना घडतात. त्यामुळे पोलीस प्रशासनाने या परिसरामध्ये लक्ष देण्याची गरज असल्याचे स्थानिक नागरिकांनी म्हटले आहे.
