लोणी काळभोर : कुटुंब देवदर्शनाला गेल्याची संधी साधून चोरट्याने घरफोडी करून घरातील रोख रकमेसह तब्बल अडीच लाखाच्या सोन्याच्या दागिन्यावर डल्ला मारल्याची घटना घडली आहे. ही घटना कुंजीरवाडी (ता. हवेली) ग्रामपंचायत हद्दीतील थेऊर फाटा जवळील चावट पाटील पार्कमध्ये घडली आहे.
याप्रकरणी सचिन कांतीलाल काळभोर ( वय 45, मुळ रा. काळभोरवस्ती, कुंजीरवाडी, ता. हवेली, जि.पुणे) यांनी लोणी काळभोर पोलीस ठाण्यात फिर्याद दिली आहे. त्यानुसार अज्ञात चोरट्याच्या विरोधात भारतीय दंड विधान संहिता कलम 380, 454 प्रमाणे गुन्हा दाखल करण्यात आला आहे.
पोलिसांनी दिलेल्या माहितीनुसार, सचिन काळभोर हे एक व्यावसायिक असून त्यांनी चावट पाटील पार्कमध्ये बंगला बांधला आहे. ते सध्या कुटुंबासोबत तेथेच राहत आहेत. त्यांच्या कुटुंबाने ठरविले की, घरातील सर्व सदस्य मिळून देवदर्शनाला जायचे. त्यानुसार काळभोर कुटुंब हे देवदर्शनाला गेले होते.
दरम्यान, घरी कोणी नसल्याची संधी साधून अज्ञात चोरट्याने 12 जून ला काळभोर यांच्या घराचा कडी कोयंडा तोडला. व घरात प्रवेश करून घरातील रोख रक्कम 10 हजार रुपये व 4 तोळे वजनाचा सोन्याचा चोकर हार असा अडीच लाख रुपयांचा मुद्देमाल लंपास केला.
याप्रकरणी अज्ञात चोरट्याच्या विरोधात लोणी काळभोर पोलीस ठाण्यात गुन्हा दाखल करण्यात आला आहे. पुढील तपास लोणी काळभोर पोलीस ठाण्याचे वरिष्ठ पोलीस निरीक्षक शशिकांत चव्हाण यांच्या मार्गदर्शनाखाली पोलीस उपनिरीक्षक अमोल घोडके करीत आहेत.
