खंडाळा : पुणे-सातारा महामार्गावर एक विचित्र अपघात झाला आहे. महामार्गावरील खंबाटकी घाट उतरल्यानंतर सातारा बाजूकडे असणाऱ्या वेळे (ता. वाई) गावाच्या हद्दीत असणाऱ्या घाट उताराच्या तीव्र वळणावर भर पावसात एक कंटेनर रस्त्यावर आडवा झाला आहे.
त्यामुळे काही काळासाठी महामार्गावरील वाहतूक खोळंबली, तसेच वाहनांच्या लांबच लांब रांगा लागल्या होत्या. हा अपघात आज रविवारी सायंकाळी साडेचार वाजण्याच्या सुमारास घडला.
याबाबत मिळालेल्या माहितीनुसार, पुणे-सातारा महामार्गावरील खांबाटकी घाट उतरल्यानंतर वेळे गावाच्या हद्दीत पावसाच्या निसरड्या रस्त्यावर कंटेनर (गाडी क्रमांक एमएच ०९. एफएल ११०५) या वाहनावरील चालकाचा ताबा सुटला, आणि कंटेनर जागेवरच उलटा फिरला. यावेळी कंटेनरचे तोंड विरुद्ध दिशेला झाले होते.
दरम्यान, या अपघातात कंटेनर चालक थोडक्यात बचावला आहे. यावेळी रस्त्यावर वाहनांची संख्या जास्त नसल्याने मोठा अनर्थ टळला. त्यानंतर महामार्ग पोलीस आणि वाहतूक पोलिसांनी तत्काळ घटनास्थळी भेट देऊन परिस्थिती नियंत्रणात आणून वाहतूक सुरळीत केली.
