सांगोला (सोलापूर): सोलापूर जिल्ह्यातील सांगोल्यामध्ये एक भीषण अपघात झाला आहे. सांगोला तालुक्यातील पंढरपूर-कराड मार्गावर भरधाव ट्रकने पाच महिलांना चिरडल्याची घटना घडली आहे. या महिला शेतातून काम करून घराकडे जाताना हा भयंकर अपघात झाला.
याबाबत सविस्तर माहिती अशी की, सांगोला तालुक्यातील चिकमहुद येथील बंडगरवाडी येथे एका आयशरने सात मजूर महिलांना चिरडल्याची घटना घडली आहे. यामध्ये पाच जणांचा जागीच मृत्यू झाला आहे. तर दोन महिला गंभीर जखमी झाल्या आहेत. आज (दि. 18) दुपारी चार वाजता हा भीषण अपघात झाला. कटफळ येथील काही महिला चिकमहुद येथील बंडगरवाडी येथील काम सुटल्यानंतर वाहनाची वाट पाहत उभ्या होत्या. याचवेळी कोळसा वाहतूक करणारा एक आयशर ट्रक समोरून आला. या आयशर ट्रक ड्रायव्हरचे वाहनावरील नियंत्रण सुटल्याने त्याने थेट उभ्या असलेल्या सातही महिलांना चिरडले. अपघातातील सर्व महिलाच या कटफळ येथील रहिवासी आहेत.
हा अपघात इतका भीषण होता की, पाच महिलांचा जागीच मृत्यू झाला आहे. तर दोघी गंभीर जखमी झाल्या आहेत. या अपघाताची माहिती मिळताच पोलीस आणि स्थानिकांनी घटनास्थळी धाव घेतली. तसेच अपघात झालेल्या आयशर ट्रकमध्ये दोघेजण होते, त्यातील एक जण पळून गेला आहे. तर एकाला पकडण्यात पोलिसांना यश आले आहे. या भीषण अपघातानंतर सर्वत्र हळहळ व्यक्त होत आहे.
