लोणी काळभोर, (पुणे) : पुणे – सोलापूर महामार्गावर एक भीषण अपघात घडला आहे. येथील कदमवाकवस्ती ग्रामपंचायत हद्दीतील एचपीसीएल कंपनीच्या समोर कंटेनरने चारचाकी गाडीला धडक दिली आहे. गाडीला धडक दिल्यामुळे चारचाकी थेट महामार्गाच्या रस्ता दुभाजकावर अडकली आहे. रविवारी (ता. 16) दुपारी दीड वाजण्याच्या सुमारास हि घटना घडली. या घटनेत कोणतीही जीवितहानी झाली नसली तरी चारचाकी गाडीचे मोठे नुकसान झाले आहे.
मिळालेल्या माहितीनुसार, मुंबई येथून निघालेल्या एकाच कुटुंबातील चौघेजण सोलापूरच्या दिशेने निघाले होते. सोलापूरच्या दिशेने जात असताना पाठीमागून आलेला कंटेनर हा त्याच बाजूने निघाला होता. यावेळी कदमवाकवस्ती ग्रामपंचायत हद्दीतील एचपीसीएल कंपनीच्या समोर चारचाकी गाडी आली असता कंटेनरने चारचाकी गाडीला धडक दिली, अशी माहिती उपस्थित नागरिकांनी सांगितली आहे.
दरम्यान, या घटनेत चारचाकी गाडी थेट महामार्गावरील रस्त्याच्या मध्यभागी असलेल्या दुभाजकावर आदळली. व त्यातच अडकून बसली. या घटनेत चारचाकीतील चौघांना कोणतीही दुखापत झाली नसली तरी चारचाकी गाडीचे मोठे नुकसान झाले आहे. पुण्याकडे जाणाऱ्या व सोलापूरच्या दिशेने जाणाऱ्या मार्गावर मोठी वाहतूक कोंडी झाली असून अर्धा तास झाले तरी वाहतूक शाखेचे पोलीस अथवा लोणी काळभोर पोलीस घटनास्थळी दाखल झाले नव्हते.
