निंबुत (पुणे): बारामती तालुक्यातील निंबुत येथे संशयास्पद विनानंबर प्लेटच्या दुचाकीवरील सशस्त्र चोरट्यांना तरुणांनी हटकले. या वेळी चोरट्यांनी स्क्रू ड्रायव्हर, गुप्ती व रिंग पाना, सत्तूर, चाकूने तरुणावर हल्ला केला. तरुणाने प्रसंगावधान राखत हल्ला चुकविल्याने मोठी दुर्घटना टळली. ही घटना गुरुवारी १३ जून रोजी दुपारी घडली. दरम्यान, वडगाव पोलीस स्टेशनमधील अधिकारी-कर्मचाऱ्यांनी घटनास्थळी भेट देऊन पाहणी केली.
मिळालेल्या माहितीनुसार, निंबुत (ता. बारामती) गावात गुरुवारी (दि. १३ जून) दुपारी दीड-दोनच्या सुमारास विना क्रमांकाच्या निळ्या रंगाच्या दुचाकीवरून तिघेजण आले. संशय आल्याने गावातील तरुणांनी हटकले असता, शस्त्रधारी तीन चोर गाडीवर निरेच्या दिशेने पळून गेले.
आठवड्यापूर्वीच निंबुत येथील फरांदेनगर येथे चोरट्यांनी दिवसा घर फोडी करून ५५ हजारांचा ऐवज लंपास केला होता. या घटनेने नागरिकांमध्ये भीतीचे वातावरण निर्माण झाले आहे. तरुणांनी व ग्रामस्थांनी रात्रीच्या वेळी गावात गस्त घालण्याचे आव्हान वडगाव पोलिसांनी केले आहे.
