पुणे : श्रीक्षेत्र भीमाशंकरकडे जाणा-या रस्त्यावर एसटी व दुचाकीमध्ये एक अपघात झाला आहे. या अपघातात दुचाकीस्वार ओम संदीप लोहकरे (वय-19) याचा जागीच मृत्यू झाला आहे. या घटनेची माहिती घोडेगाव पोलीस स्टेशनला मिळताच पोलीस घटनास्थळी दाखल झाले.
मिळालेल्या माहितीनुसार, श्रीक्षेत्र भीमाशंकरकडे जाणा-या मंचर-भीमाशंकर रस्त्यावर राजपूर गावच्या हद्दीतील भक्तनिवासासमोर मंचर आगाराची एसटी बस (एमएच 06 एस 8397) ही पुण्यावरुन भीमाशंकरकडे जात होती. तर म्हतारबाचीवाडी येथून ओम संदीप लोहकरे हा तरुण दुचाकी (एमएच 14 एफव्ही 2415) घेऊन तळघरच्या दिशेने निघाला होता.
यावेळी भीमाशंकर भक्तनिवासासमोर एसटी बस ही भरधाव वेगाने जात असताना दुचाकी स्वारास बसच्या मागील बाजूचा कट लागला. यामध्ये दुचाकीस्वार रस्त्यावर पडून त्याचा जागीच मृत्यू झाला आहे. यावेळी झालेल्या अपघातामुळे एसटी चालक नीलेश सखाराम भोर यांना पोलीसांनी ताब्यात घेतले आहे.
या घटनेचा पुढील तपास घोडेगाव पोलीस स्टेशनचे सहायक पोलीस निरीक्षक किरण भालेकर करीत आहे.
