नागपूर : शहर पोलिसांनी सराईत गुन्हेगाराला एक वर्षांसाठी शहरातून तडीपार केले. बादल उर्फ सुनील नाना नेताम (२०, रा. जंबोदीपनगर, आदिवासी झोपडपट्टी) असे तडीपार करण्यात आलेल्या सराईत गुन्हेगाराचे नाव आहे.
बादल नेताम हा आपल्या परिसरातील लोकांना दमदाटी करणे, मारहाण करणे, बेकायदेशीरपणे मोहफुलाची दारू, देशी दारूविक्रीसाठी जवळ बाळगणे अशा प्रकारचे गुन्हे करतो. तसेच इतरांचे जीवित व व्यक्तिगत सुरक्षितता धोक्यात येईल असे कृत्य करतो. त्यामुळे परिसरात दहशत निर्माण झाली आहे. त्याच्या दहशतीमुळे नागरिकांमध्ये असुरक्षितेची भावना निर्माण झाली आहे. आरोपीच्या बेकायदेशीर वागण्यासह वाईट कृत्यांमुळे लोकांच्या जीवितास व मालमत्तेस धोका निर्माण झाला आहे. त्याच्या गुन्हेगारी प्रवृत्तीला आळा बसावा यासाठी प्रतिबंधक कारवाई करण्यात आली. परंतु त्याच्या प्रवृत्तीत सुधारणा झाली नाही. त्यामुळे गुन्हेगाराविरुद्ध हुडकेश्वरच्या वरिष्ठ पोलीस निरीक्षकांनी आरोपीला तडीपार करण्यासाठी प्रस्ताव तयार केला. उपायुक्तांनी आरोपीला नागपूर शहर हद्दीतून एक वर्षासाठी तडीपार केले.
