पिंपरी : बनावट कागदपत्रांसह भारतात बेकायदेशीररित्या राहणार्‍या दोन महिलांसह चार बांगलादेशी नागरिकांना पिंपरी-चिंचवड पोलिसांच्या दहशत विरोधी पथकाने अटक केली आहे. ही कारवाई शनिवारी ८ जून रोजी सकाळी सहा वाजण्याच्या सुमारास मोशी येथे करण्यात आली. पूजा धन्नो सरकार उर्फ रुबाया बिलाल मासूम नूर इस्लाम शेख (वय २४), तिचा पती धन्नो अरुण सरकार (वय २६), दीर मन्नो अरुण सरकार (वय २४) आणि लाबोनी सुशील अय्यर उर्फ साथी खातून मंडल (वय २८) या चार बांगलादेशी नागरिकांना अटक केली आहे.
तसेच आरोपीना बनावट कागदपत्रे बनवून देणार्‍या इतर आरोपींवर गुन्हा दाखल करण्यात आला आहे. याप्रकरणी दहशत विरोधी पथकाचे पोलीस शिपाई तान्हाजी सोनवणे यांनी एमआयडीसी भोसरी पोलीस ठाण्यात फिर्याद दिली आहे.
याबाबत अधिक माहिती अशी कि, आरोपी हे बांगलादेशी नागरिक असून त्यांच्याकडे कोणताही परवाना नसताना वैध प्रवासी कागदपत्रांशिवाय ते भारतात राहत होते. भारत व बांगलादेश सीमेवरील मुलकी अधिकार्‍यांच्या लेखी परवानगी शिवाय १२ वर्षांपूर्वी त्यांनी भारतात घुसखोरी केली आहे.
गेल्या दोन वर्षांपासून ते पुण्यातील मोशी येथे वास्तव्य करत आहेत. आरोपी धन्नो हा मोशी येथे रस्त्यावर फळविक्रीचा व्यवसाय करत आहे. तर त्याचा भाऊ मन्नो हा एका कंपनीत कामाला आहे. या सर्व आरोपींची बनावट आधारकार्ड, जन्म दाखला, शाळा सोडल्याचा दाखला बनवून घेतला आहे.
त्याच आधारे ते भारतीय नागरिक असल्याचे भासवात होते. बनावट कागदपत्रांच्या आधारे त्यांनी सिमकार्डही काढून घेतले आहे. त्यांच्यावर परकीय नागरिक कायदा, पारपत्र अधिनियम या अंतर्गत गुन्हे दाखल केले असून पुढील तपास सहायक पोलिस निरीक्षक पठारे करीत आहेत.
