अक्षय टेमगिरे
रांजणगाव गणपती: सध्या पुण्यातील हिट अँड रन प्रकरणाची देशभरात जोरदार चर्चा आहे. एका बड्या बांधकाम व्यावसायिकाच्या मुलाने दारुच्या नशेत वेगाने आलिशान पोर्शे कार चालवत दोघांना उडवल्याने दुचाकीवरील तरुण-तरुणीचा मृत्यू झाला होता. ही घटना ताजी असतानाच शिरुर तालुक्यातही पोर्शे पॅटर्नची पुनरावृत्ती झाली आहे. एका अल्पवयीन पोलिस पाटलाच्या मुलीने 31 मे रोजी सकाळी सव्वा दहाच्या सुमारास मालवाहू पिकअप चालविताना दुचाकीला धडक दिल्याने दुचाकीवरील तीस वर्षीय तरुणाचा जागीच मृत्यू झाला असुन दुसरा व्यक्ती जखमी झाला आहे.
या प्रकरणी सतिश विठ्ठल मेमाणे (रा. वडगाव बांडे, ता. दौंड, जि. पुणे) यांनी शिक्रापुर पोलिस स्टेशनमध्ये फिर्याद दिली आहे. 31 मे रोजी सकाळी सव्वा दहाच्या सुमारास मयत अरुण मेमाणे व त्याचा मित्र महिंद्र बांडे हे दोघे स्प्लेंडर गाडीवर रोहित्राचे ऑइल आणण्यासाठी वडगाव बांडे येथून न्हावरेला निघाले होते. मोटार सायकल अरुण मेमाणे हा चालवित होता. त्याच्या पाठीमागे महिंद्र बांडे हा बसलेला होता. सदर मोटारसायकल अरणगाव (ता. शिरुर) येथे आली असताना त्यांच्या मोटार सायकलला पिकअप चालकाने समोरासमोर धडक दिली. यामध्ये दुचाकी चालक अरुण मेमाणे याचा जागीच मृत्यू झाला, तर महिंद्र बांडे हा जखमी झाला.
हा अपघात एवढा भीषण होता की, मालवाहू पिकअपने मोटार सायकलसह चालकास 20 ते 30 फुट फरफटत नेले. हे पिकअप अरणगावाचे पोलिस पाटील संतोष लेंडे यांची अल्पवयीन मुलगी (अंदाजे वय 15) चालवत होती. तिच्यासोबत शेजारील सीटवर पोलिस पाटील संतोष लेंडे बसले होते. सदर मुलीने तिच्या ताब्यातील पिकअप जोरात भरधाव वेगाने चालवत मोटार सायकलला समोरुन धडक दिली. तसेच अपघात झाल्यानंतर मदत न करता त्या दोघांनीही घटनास्थळावरून पळ काढला .
याबाबत शिक्रापुर पोलिस स्टेशन येथे मयत अरुण मेमाणे यांचा भाऊ सतिश मेमाणे यांनी फिर्याद दिली असून अल्पवयीन मुलीचे वडील अरणगावचे पोलिस पाटील संतोष लेंडे यांच्यासह अल्पवयीन मुलीवर गुन्हा करण्यात आला आहे. या घटनेचा पुढील अधिक तपास शिक्रापुर पोलिस करत आहेत.
