पुणे : पुण्याचे जिल्हाधिकारी सुहास दिवसे यांच्यावर खेड आळंदीचे प्रांताधिकारी आणि सहाय्यक निवडणूक अधिकारी जोगेंद्र कट्यारे यांनी गंभीर आरोप केले आहेत. कट्यारे यांनी निवडणूक आयोगाला एक पत्र लिहिले आहे. पुण्याचे जिल्ह्याधिकारी सुहास दिवसे हे खेड आळंदीचे आमदार यांच्या प्रभावाखाली काम करत असल्याचा आरोप त्या पत्रामध्ये केला आहे.
जोगेंद्र कट्यारे यांनी काय केला आरोप?
खेडचे प्रांताधिकारी आणि सहाय्यक निवडणूक अधिकारी जोगेंद्र कट्यारे म्हणाले कि, सुहास दिवसे हे खेड आळंदीचे आमदारांच्या प्रभावाखाली काम करत आहेत. सुहास दिवसे हे अनेक वर्षे कृषी आयुक्त, क्रिडा आयुक्त, पी एम आर डी ए चे संचालक अशा विविध पदांवर काम करत पुण्यातच ठाण मांडून आहेत. दिवसे यांनी माझ्या कार्यकाळात झालेल्या जमिन अधिग्रहण प्रकरणांची आधीच चौकशी सुरू केलेली असताना 28 मे रोजी त्यांनी खेडच्या तहसील कार्यालयात पुन्हा छापा घातला.
सुहास दिवसे यांनी हे सर्व खेड आळंदीच्या आमदारांच्या प्रभावातून केले आहे. सुहास दिवसे हे निवडणुकीच्या काळात सतत खेड आळंदीच्या आमदारांना भेटत होते. आगामी विधानसभा निवडणुका स्वतंत्र वातावरणात पार पाडण्यासाठी सुहास दिवसे यांची बदली होणे आवश्यक आहे, असा आरोप कट्यारे यांनी केला आहे.
जिल्हाधिकारी सुहास दिवसे यांचे जोरदार प्रत्युत्तर
जिल्हाधिकारी सुहास दिवसे म्हणाले की, माझ्यावर आरोप असलेले पत्र मी आज पाहिले, मी एकाचवेळी जिल्हाधिकारी आणि जिल्हा निवडणूक अधिकारी म्हणून दोन पातळ्यांवर काम करत असतो. माझ्यावर आरोप करणाऱ्या कट्यारे यांनी यात गल्लत केली आहे. कट्यारे यांची बदली करण्याचा अधिकार शासनाला आहे.
मी जिल्हाधिकारी पदावर येण्याआधी कट्यारे यांच्याविरोधात तक्रारी आल्या होत्या आणि त्याची चौकशी करण्यात येते आहे. कट्यारे यांच्याकडून जमीन अधिग्रहणाची भरपाई देण्याची जबाबदारी काढून घेण्यात आल्याने ते व्यथित झाले असावेत, असे जिल्हाधिकारी सुहास दिवसे यांनी म्हटले आहे.
प्रांताधिकारी कट्यारे यांनी भरपाई देण्याच्या निकालात अनेक बदल केलेले असून नियमभंग केलेला आहे. कट्यारे यांनी जर चुकीचे काही केलेले नसेल तर त्यांनी तपासणीला घाबरण्याचे कारण नाही. राजकीय संबंध असल्याच्या आरोपांना उत्तर देण्यात अर्थ नाही, मी पुणे जिल्ह्यातील २१ आमदारांसोबत आणि चार खासदारांसोबत काम करतो, असे प्रत्युत्तर सुहास दिवसे यांनी दिले.
प्रांताधिकारी कट्यारेंच्या तक्रारीला दिलीप मोहितेंच उत्तर
आमदार दिलीप मोहिते पाटील म्हणाले कि, म्हणाले की, पुण्यातील खेड-राजगुरूनगरचे प्रांताधिकारी जोगेंद्र कट्यारेंनी कायतरी पाप केलं आहे, म्हणूनच मी आत्महत्या करेन, अशी धमकी त्यांना द्यावी लागत आहे. सरकारने या प्रकरणाची चौकशी करावी. येत्या अधिवेशनात मी प्रांताधिकारी कट्यारे आणि तहसीलदार प्रशांत बेडसे यांच्याबाबतचा हा प्रश्न उपस्थित करणार आहे, असे दिलीप मोहिते पाटील म्हणाले.
