पुणे : किंग खान अर्थात अभिनेता शाहरुख खान (बुधवारी) 2 नोव्हेंबरला त्याचा 57 वा वाढदिवस साजरा करीत आहे. यावेळी शाहरुखचा वाढदिवस अनेक अर्थांनी खास असणार आहे.
आपल्या वाढदिवशीच त्याच्या बहुप्रतिक्षित ‘पठान’ चित्रपटाचा टिझर प्रदर्शित होण्याची शक्यता आहे. यशराज फिल्म्सने शाहरुखच्या वाढदिवशी चित्रपटाचा टिझर रिलीज करण्याची योजना आखली आहे.
शाहरुख खान व्यतिरिक्त ‘पठान’मध्ये दीपिका पदुकोण आणि जॉन अब्राहम यांच्याही भूमिका आहेत. सिद्धार्थ आनंद दिग्दर्शित हा चित्रपट यशराज फिल्म्सच्या बॅनरचा एक स्पाय थ्रिलर चित्रपट आहे. यशराज फिल्म्सने याआधी ‘एक था टायगर’, ‘टायगर जिंदा है’ आणि ‘वॉर’सारख्या स्पाय थ्रिलर चित्रपटांची निर्मिती केली आहे. आता या यादीत ‘पठान’चेही नाव जोडले जाणार आहे. ‘पठान’ 25 जानेवारी 2023 रोजी थिएटरमध्ये रिलीज होणार आहे.
याशिवाय शाहरुखचा ऑल टाइम ग्रेट चित्रपट ‘दिलवाले दुल्हनिया ले जायेंगे’ पुन्हा प्रदर्शित करण्याची तयारीही सुरू आहे. शाहरुख खानचा गेल्या चार वर्षांपासून कोणताही मोठा चित्रपट प्रदर्शित झालेला नाही, साहजिकच त्याचे चाहते ‘पठान’ची आतुरतेने वाट पाहत आहेत. आता चित्रपटाच्या निर्मात्यांनी चाहत्यांना एक नाही तर दोन खुशखबर देण्याची तयारी केली आहे.
‘दिलवाले दुल्हनिया ले जायेंगे’ देखील देशातील निवडक चित्रपटगृहांमध्ये प्रदर्शित होणार आहे. ‘दिलवाले दुल्हनिया ले जायेंगे’ हा देखील यशराज फिल्म्सच्या बॅनरखाली बनवण्यात आला होता, ज्याचे दिग्दर्शन आदित्य चोप्रा यांनी केले होते.
20 ऑक्टोबर 1995 रोजी प्रदर्शित झालेला ‘दिलवाले दुल्हनिया ले जायेंगे’ हा भारताच्या इतिहासात चित्रपटगृहांमध्ये सर्वाधिक काळ चालणारा चित्रपट आहे. मुंबईतील मराठा मंदिर सिनेमागृहात 27 वर्षांपासून हा चित्रपट अविरतपणे सुरू आहे.
शाहरुखच्या वाढदिवसानिमित्त हा चित्रपट देशातील निवडक शहरांमध्ये पुन्हा प्रदर्शित होणार आहे. मुंबई, दिल्ली एनसीआर, कोलकाता, कानपूर, अहमदाबाद, लखनऊ, पुणे आणि सुरत येथील पीव्हीआर थिएटर्सनेही बुकिंग सुरू केले आहे. तिकिटांचे दरही 100 रुपयांच्या आसपास ठेवण्यात आले आहेत.
