सोलापूर : लोकसभा निवडणुकीच्या (Lok Sabha elections) प्रचारासाठी पंतप्रधान नरेंद्र मोदी (PM Narendra Modi) आज सोलापूरात होते. सोलापूर लोकसभा मतदारसंघात भाजपकडून राम सातपुते (Ram Satpute) यांना उमेदवारी देण्यात आली आहे. त्यांच्या प्रचारार्थ मोदींची पार्क मैदानावर सभा झाली. यावेळी पंतप्रधान नरेंद्र मोदींनी काँग्रेसवर जोरदार निशाणा साधला.
यावेळी बोलताना नरेंद्र मोदी म्हणाले, माझ्या प्रिय सोलापूरकरांना अतिशय मनापासून नमस्कार करतो. जय जय रामकृष्ण हरी, सोलापूरचे ग्रामदेवत श्री सिद्धेशवराच्या चरणी मी नतमस्तक होतो. तुम्ही गेल्या 10 वर्षांपासून मोदींच्या कामांना पाहिले आहे. त्यांच्या एक एक शब्द ऐकले आहेत. त्यामुळे तुम्ही मोदींना ओळखता. तर दुसरीकडे इंडिया आघाडीत नेत्याच्या नावावर महायुद्ध सुरु आहे. आता मला सांगा ज्याचे नाव माहिती नाही, ज्याचा चेहरा माहिती नाही, त्याच्या हातात तुम्ही इतका मोठा देश देणार आहात का? असे नरेंद्र मोदी यांनी म्हटले.
यंदाच्या निवडणुकीत तुम्ही पुढील पाच वर्षांसाठी विकासाच्या गॅरंटीला निवडणार आहात. दुसरीकडे ते लोक आहेत ज्यांनी 2014 च्या आधी देशाला भष्ट्राचार, आतंकवाद आणि कुशासनात लोटले होते. त्यांच्या या कलंकित इतिहासानंतरही काँग्रेस परत देशाची सत्ता मिळवण्याचे स्वप्न पाहत आहे.
