सुपे : कारखेल (ता. बारामती) येथे निघालेल्या कॉलेजच्या विद्यार्थ्यास बसमधून उतरताच पाच अल्पवयीन मुलांनी कोयते, कुऱ्हाडीने वार करून त्याचा जीव घेतला. ही भयंकर घटना आज (गुरुवार, दि. १८ एप्रिल) दुपारी घडली. कोयता, सत्तूर, कुऱ्हाडीच्या हल्ल्यात गंभीर जखमी झाल्याने त्याचा मृत्यू झाला. विनोद प्रवीण भोसले (वय १७) असे मृत्यू झालेल्या महाविद्यालयीन तरुणाचे नाव आहे.
पोलिसांनी सांगितले की, कारखेल (ता. बारामती) येथील विनोद प्रवीण भोसले (वय-१७) हा युवक श्रीगोंदा येथील सोनिया गांधी पोलटेक्निकला इयत्ता बारावीमध्ये शिक्षण घेत होता. तो आज साडे पाच वाजता एसटीने घराकडे येत होता. उंडवडी- सुपे येथे बसमधून उतरून तो कारखेलकडे निघाला होता. त्याचवेळी त्याच्यावर पाळत ठेऊन असलेल्या पाच अल्पवयीन मुलांनी त्याला घेरले. बसमधून उतरताच त्याच्यावर हल्लेखोरांना कोयता, सत्तूरने गंभीर हल्ला केला, त्यामध्ये त्याचा मृत्यू झाला. दरम्यान, सुपे पोलीस स्टेशनचे सहाय्यक पोलिस निरिक्षक नागनाथ पाटील यांनी घटनास्थळी धाव घेतली. यानंतर काही वेळातच संशयित अल्पवयीन मुलांना पोलिसांनी ताब्यात घेतले.
